تۇركىستان وبلىسىنىڭ بارلىق اۋماعىندا دەرلىك قار قالىڭ ءتۇسىپ جاتىر. قازىرگى تاڭدا رەسپۋبليكالىق ماڭىزى بار اۆتوموبيل جولدارىن قاردان تازالاۋ جۇمىستارى توقتاۋسىز جۇرگىزىلۋدە. جوسپارعا ساي ماماندار بەكىتىلىپ، جۇمىستار قولعا الىنعان.

«قازاۆتوجول» ۇق» اق تۇركىستان وبلىستىق فيليالى مەن تۇركىستان وبلىسى جولاۋشىلار كولىگى جانە اۆتوموبيل جولدارى باسقارماسىنىڭ حابارلاۋىنشا، جولاۋشىلاردىڭ ءقاۋىپسىز قوزعالىسىن قامتاماسىز ەتۋ ماقساتىندا قاردان تازالاۋ جانە ينەرتتى ماتەريالداردى سەبۋ جۇمىستارى جالعاسىپ جاتىر.

وعان ارنايى تەحنيكالار تارتىلعان. اتاپ ايتساق، 33 جول تازالايتىن كولىك، 7 اۆتوگرەيدەر، 18 تراكتور جۇمىلدىرىلعان.

«قۇرمەتتى كولىك جۇرگىزۋشىلەرى! مۇمكىندىگىنشە الىس ساپارعا شىقپاۋلارىڭىزدى وتىنەمىز. اسا قاجەت بولعان جاعدايدا جول قاۋىپسىزدىگى ەرەجەلەرىن قاتاڭ ساقتاۋلارىڭىزدى جانە اۆتوكولىكپەن تەك قىسقى شينامەن شىعۋلارىڭىزدى سۇرايمىز!» دەيدى ماماندار.

قار قۇرساۋىندا قالىپ قويعان جاعدايدا تاۋلىك بويى جۇمىس ىستەيتىن 1403 نومىرىنە حابارلاسۋ قاجەت.