بۇگىن تۇركىستان وبلىسى اكىمىنىڭ ورىنباسارى بەيسەن تاجىبايەۆ ءبىر توپ قالامگەرمەن كەزدەسۋ وتكىزدى. كەزدەسۋگە قازاقستان جازۋشىلار وداعى باسقارما ءتوراعاسىنىڭ ورىنباسارى قاسىمحان بەگمانوۆ، قازاقستان جازۋشىلار وداعىنىڭ مۇشەسى، سىنشى ارميابەك ايت، فيلولوگيا عىلىمدارىنىڭ دوكتورى، پروفەسسور قانسەيىت ابدەز ۇلى، اقىن، حالىقارالىق «تۇركىستان» گازەتىنىڭ باس رەداكتورى باۋىرجان باباجان ۇلى، قازاقستان جازۋشىلار وداعى تۇركىستان وبلىستىق فيليالىنىڭ ءتوراعاسى ايدار سەيدازىم، «Turkistan Media Holding» جشس-نىڭ باسقارۋشى ديرەكتورى، جۋرناليست تەلمان بەيسەن جانە وبلىستىق مادەنيەت جانە تۋريزم باسقارماسىنىڭ وكىلدەرى قاتىستى، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.

مازمۇندى جيىندا وبلىس اكىمىنىڭ ورىنباسارى قالامگەردى مەرەيتويىمەن قۇتتىقتاي وتىرىپ، وڭىردە اتقارىلىپ جاتقان شارالارعا توقتالىپ، بەس جىلدىق بەلەستە اۋقىمدى ىستەر قولعا الىنعانىنا توقتالدى.

سونىمەن قاتار جىل سوڭىنا دەيىن وبلىس اۋماعىندا قالامگەرلەرمەن 20 ادەبي كەزدەسۋ وتكىزۋ جوسپارلانعانىن، سونىڭ العاشقىسى وسى ساپار ەكەنىن اتاپ ءوتتى. اتالعان كەشتەر وبلىستىڭ اۋدان، قالالارىندا وتەدى. وسى ارقىلى تۇركىستان ءوڭىرىنىڭ رۋحاني الەۋەتىن كوتەرىپ، تۇركىستان قالاسىن تاريحي ەلوردا رەتىندە دامىتۋ كوزدەلگەن.

قاسىمحان بەگمانوۆ وبلىس باسشىلىعىنىڭ وسىنداي قۇرمەتپەن قارسى الىپ جاتقانىنا العىسىن جەتكىزىپ، ءوزىنىڭ ءان جيناعى مەن ءۇش بىردەي كىتابىن تارتۋ ەتتى. وزگە دە قالامگەرلەر كيەلى مەكەن تۇركىستاننىڭ جاڭا كەيىپكە ەنىپ، گۇلدەنگەنىن تىلگە تيەك ەتتى.

تۇركىستان وبلىسى اكىمدىگىنىڭ قولداۋىمەن، وبلىستىق مادەنيەت جانە تۋريزم باسقارماسىنىڭ ۇيىمداستىرۋىمەن ءوتىپ جاتقان قالامگەرلەردىڭ وڭىردەگى ساپارى تۇركىستانداعى «فاراب» كىتاپحاناسىندا قاسىمحان بەگمانوۆتىڭ «جىرىم سەنسىڭ، تۋعان جەر» اتتى شىعارماشىلىق كەشىمەن جالعاستى. اقىننىڭ سوزىنە جازىلعان اندەر شىرقالىپ، تەاتر ارتىستەرى ولەڭدەرىن وقىدى. وبلىس اكىمىنىڭ اتىنان قۇرمەت كورسەتىلدى. ەرتەڭ اقىننىڭ تۋعان اۋىلى ساۋران اۋدانى مەن كەنتاۋ قالاسىندا كەشى وتەدى.