بايقاۋعا اۋدان اكىمى ن.تۇراشبەكوۆ، حالىقارالىق «الاش»، «باۋىرمال» سىيلىقتارىنىڭ لاۋرەاتى، جازۋشى-جۋرناليست م.بايعۇت، قازاقستان رەسپۋبليكاسىنىڭ قۇرمەتتى ءجۋرناليسى، تۇركىستان وبلىسىنىڭ قۇرمەتتى ازاماتى ب.قونىسبەك، جازۋشى، پروفەسسور ن.قادىربايەۆ، اقىن، تۇرىكتانۋشى س.ساحابات جانە اۋدان تۇرعىندارى مەن زيالى قاۋىم وكىلدەرى قاتىستى. الدىمەن بايقاۋعا قاتىسۋشىلار ءوز ولەڭدەرى مەن جەرگىلىكتى اقىن- جازۋشىلاردىڭ شىعارمالارىن ورىندادى. ءبىر ايعا جۋىق وتكىزىلگەن بايقاۋدىڭ قورتىندىسى شىعارىلىپ، جەڭىمپاز اتانعان وقۋشىلار ماراپاتتالدى.
بايقاۋ بويىنشا م.بايعۇت، ب.قونىسبەك، ن.قادىربايەۆ، س.ساحابات ءسوز سويلەپ، بايقاۋدىڭ ەرەكشەلىكتەرى جايلى ايتىپ ءوتتى. بايقاۋدا اۋدان اكىمى ن.تۇراشبەكوۆ ءسوز الىپ، قوردىڭ اتقارعان جۇمىسىنا ريزاشىلىعىن ءبىلدىرىپ، ءبىر توپ ۇستازداردى العىس حاتپەن ماراپاتتادى. سونىمەن قاتار قارىمدى جۋرناليستتەر ب.قونىسبەك پەن م.بايعۇتقا اۋداننىڭ 90 جىلدىق مەدالىن تابىستادى. اۋدان تۋماسى، جازۋشى م.بايعۇتقا اۋدان باسشىسى قازاقى داستۇرمەن شاپان جاۋىپ، ات مىنگىزدى.
جالپى «مارحابات-ميراس قورى» جاستاردى كىتاپ وقۋعا باۋلۋ، دارىندى جاستاردىڭ شىعارماشىلىعىنا قولداۋ كورسەتۋ ماقساتىندا ەل سۇيسىنەتىندەي، جۇرت قىزىعاتىنداي جوبالاردى قولعا الىپ، جۇزەگە اسىرۋدا.
ماسەلەن، قور قۇرىلعان العاشقى جىلدارى الەمگە تانىلعان گرەيگ قىزعالداعى جايىندا «شىرايلىم – شۇبايقىزىلىم» جوباسى جاس جازبا اقىنداردىڭ بايقاۋى، رەسپۋبليكالىق جانە حالىقارالىق دەڭگەيدە ۇيىمداستىرىلدى. بايقاۋدا جاس تالاپكەرلەردىڭ تۇساۋى كەسىلىپ، قازاق قىزعالداعى، تۋعان جەر، ەگەمەندى ەل، اتامەكەن تۋرالى ورەلى ولەڭدەر مەن قاراسوزبەن ورنەكتەلگەن تولعامدار دۇنيەگە كەلدى.
سونىمەن قاتار قوردىڭ ۇيىتقى بولۋىمەن «تاۋپىستەلى تاعىلىمى»، «مارحابات وقۋلارى»، «تۇتقاباي تولعانىستارى» جوبالارى اياسىندا بايقاۋلار، فورۋمدار، كەزدەسۋلەر وتكىزىلىپ، ادەبيەتىمىزدىڭ دامۋىنا وزىندىك ۇلەس قوستى.
Dalanews.kz
