تاعى ءبىر ايتا كەتەرلىگى، ءدال وسى كوكتەمگى تازالىق كۇندەرى قارساڭىندا تال وتىرعىزۋ جۇمىستارى دا قولعا الىنا باستادى. بۇنداي يگى شارا شۋ قالاسىنداعى «تارلان» سپورت كەشەنىنىڭ ماڭىندا ورىن الدى. يگىلىكتى ىسكە اۋدان اكىمىنىڭ اپپاراتى، اۋداندىق ءماسليحات اپپاراتى، دەپۋتاتتار جانە اۋدان جاستارى اتسالىستى. جۋىق ارادا اتالمىش سپورت كەشەنىنىڭ ماڭى كوز سۇيسىنەر جاسىل جەلەككە اينالارى حاق. سەبەبى، ءدال سول كۇنى 500-گە جۋىق اعاش كوشەتتەرى وتىرعىزىلعان بولاتىن.
اۋداندىق ءماسليحات دەپۋتاتتارىنىڭ قاتىسۋىمەن وتكەن تال ەگۋ ءقازىر دە جالعاسىن تابۋدا. دالىرەك ايتساق، اۋدان ورتالىعى تولە بي اۋىلىنداعى م.اۋەزوۆ اتىنداعى شاعىن ورتالىقتى ورتا مەكتەبىنىڭ ماڭىنا 350 ءتۇپ ساندىك جانە جەمىس اعاشتارى، «باتىس» مولتەك اۋدانىندا سالىنعان جاڭا مەشىتتىڭ اينالاسىنا 20 ءتۇپ قىلقان جاپىراقتى اعاش تۇپتەرى وتىرعىزىلدى. اتالعان جەرلەرگە شۋ اۋدانىنىڭ قۇرمەتتى ازاماتى، قازاق اگرارلىق ۋنيۆەرسيتەتىنىڭ ورمان شارۋاشىلىعى فاكۋلتەتىنىڭ دەكانى قۇرمانكۇل ابايەۆا دەمەۋشىلىك كورسەتكەندىگىن ەرەكشە اتاپ وتكەنىمىز ءجون. تابيعات جاناشىرى №40 ورتا مەكتەبىنە دە 100 ءتۇپ جەمىس اعاشتارىن سىيلاعان بولاتىن. بۇل ءوز كەزەگىندە اۋدان ازاماتتارىنىڭ تۋعان جەرىنە دەگەن ءوزىنىڭ سۇيىسپەنشىلىگىن بىلدىرسەك كەرەك-تى. حالقىمىزدا كەز كەلگەن جان ارتىنا ءبىر تال وتىرعىزىپ كەتۋى قاجەت دەگەن جاقسى ءتامسىل بار. لايىم ءاربىر وتىرعىزىلعان اعاش اۋداننىڭ گۇلدەنۋىنە ۇلەس قوسىپ جۇرگەن تۇلعالاردىڭ جەتىستىگىمەن قاتارلاسا وسە بەرسىن دەمەكپىز.
جامبىل وبلىسى
شۋ اۋدانى
