الماتى وبلىسىنداعى تۇرگەن وزەنى باسسەينىندەگى جاعداي كۇردەلى، - دەپ حابارلايدى Dalanews.kz. 

بۇل تۋرالى توتەنشە جاعدايلار مينيسترلىگى حابارلادى. الماتى وبلىسىندا تۇرگەن وزەنى باسسەينىنىڭ مۇزداق كولدەرىندە  سۋدىڭ توگىلۋى مەن سەلدىڭ ورىن الۋ ءقاۋپىن بولدىرماس ءۇشىن سۋ دەڭگەيىن تومەندەتۋ بويىنشا  الدىن الۋ جۇمىستارى جۇرگىزىلۋدە.

جاقىندا تج ۆيسە-مينيسترى باتىربەك ابدىشيەۆتىڭ ۇيلەستىرۋىمەن تجم قازاۆياقۇتقارۋدىڭ  ەكى تىكۇشاعىمەن مۇزداق كولدىڭ ماڭىندا جابدىقتاردى تاسىمالداپ ءتۇسىرۋ جۇمىستارىن جۇزەگە اسىرىلدى. جۇمىستاردى «قازسەلدەنقورعاۋ» مم باسشىلىعى مەن اۆاريالىق بريگاداسى جۇرگىزدى.

ەكى كۇن ىشىندە ولار سيفون توسەۋ ارقىلى ەرىگەن مۇزدىق سۋىن ايداۋ جۇمىستارىن دا جۇرگىزدى.  وسىلايشا بۇگىن ۇزىندىعى 300-گە جۋىق مەتر، ونىمدىلىگى سەكۋندىنا 110 ليتر بولاتىن العاشقى سيفون تىزبەگى ىسكە قوسىلدى.

كولدەردەگى جۇمىستار اۋا رايىنا بايلانىستى جالعاساتىن بولادى (شامامەن اعىمداعى جىلعى 16 شىلدەگە دەيىن). ايتا كەتەيىك، جۇرگىزىلىپ جاتقان جەدەل جۇمىستار ادامداردىڭ ومىرىنە جانە وبەكتىلەردىڭ قيراۋىنا ءقاۋىپ توندىرەتىن سەل تاسقىنىنىڭ پايدا بولۋ ءقاۋپىن بولدىرماۋعا باعىتتالعان. دايىندىق جۇمىستارى الماتى وبلىسى اكىمدىگىنىڭ قولداۋىمەن ۇيىمداستىرىلدى.

ەستەرىڭىزگە سالا كەتەيىك، الماتى وبلىسىنىڭ اۋماعىندا تۇرگەن وزەنىنىڭ باسسەينىندە كۇردەلى سەل جاعدايى بايقالادى. قاۋىپ-قاتەر ايماعىندا 30 مىڭنان استام ادام تۇراتىن تاۋ-تۇرگەن، تۇرگەن، قاراكەمەر، بالتاباي ەلدى مەكەندەرى بار. وسىعان بايلانىستى مۇزدىقتىڭ جانە تۇرگەن وزەنى باسسەيىنى كولىنىڭ سەل جانە گيدرومەتەورولوگيالىق جاعدايىنا مونيتورينگ ۇيىمداستىرىلدى.

«قازسەلدەنقورعاۋ» مم بەكەتتەرى حالىقتى ۋاقتىلى حاباردار ەتۋ ءۇشىن تاۋلىك بويى جۇمىس ىستەيدى.

بۇل ايماققا بارۋعا ۋاقىتشا شەكتەۋلەر ەنگىزىلدى. جاياۋ تۋريستەردى، اۆتوكولىك يەلەرىن، جەرگىلىكتى تۇرعىندار مەن اتقارۋشى ورگانداردى قۇلاقتاندىرۋ جۇمىستارى جۇرگىزىلۋدە.

توتەنشە جاعدايدىڭ الدىن الۋ ءۇشىن بارلىق مۇمكىن شارالار قابىلدانۋدا.