تۇلكىباس اۋدانىنىڭ تۇلەكتەرى مۇقتاج وتباسىعا اۋدان ورتالىعىنان باسپانا سىيلادى، – دەپ حابارلايدى Dalanews.kz

اباي اتىنداعى ءبىلىم ورداسى مەن ب.سادىقوۆ جانە م.لومونوسوۆ اتىنداعى مەكتەپتەرىن 20 جىل بۇرىن ءتامامداعان تۇلەكتەر 13 ملن تەڭگەگە جۋىق قاراجات جيناپ، سونىڭ 9 ملن تەڭگەسىنە ءۇي ساتىپ العان. كەيىن باسپانانى تولىق جوندەۋدەن وتكىزىپ، ءىشىن قاجەتتى جيھاز-تەحنيكالارمەن جابدىقتاپ بەرىپ وتىر.

قاسيەتتى جۇما كۇنى ساۋاپتى ءىستى ۇران قىلعان تۇلكىباستىقتار ءۇيدىڭ اۋلاسىندا 300 ادامعا اس بەرىپ، قاراتايەۆتار وتباسىنا ءۇيدىڭ كىلتىن تابىستادى. جاس وتباسىنىڭ وتاعاسى 1-توپ مۇگەدەكتىگى بار ازامات. وسى كەزگە دەيىن وتباسىمەن جالدامالى پاتەردە تۇرىپ كەلگەن.

يگى شارادا اۋدان اكىمىنىڭ ورىنباسارى ە.ورمانوۆ، اۋداندىق ارداگەرلەر كەڭەسىنىڭ ءتوراعاسى ق.اناشيەۆ، ارداگەر ۇستازدار مەن اتالعان ءبىلىم وردالارىن بىتىرگەن تۇلەكتەر ءسوز سويلەپ، باسپانالى بولعان جاس وتباسىعا ىستىق لەبىزدەرىن ءبىلدىردى.

شارا سوڭىندا ءداستۇر بويىنشا 2005 جىلعى مەكتەپ تۇلەكتەرى ەستافەتانى 2006 جىلعى تۇلەكتەرگە تابىستادى. ايتا كەتەيىك، ءدال وسىنداي يگى شارا اۋدان ورتالىعىنان بولەك، تۇلكىباس كەنتىندە دە جالعاسىن تاپپاق. ول جەردە دە مەكتەپ بىتىرگەندەرىنە 20 جىل بولعان تۇلەكتەر 2 مۇقتاج وتباسىعا باسپانا سىيلاعالى وتىر. يگى داستۇرگە ارنالعان بۇل باستاما 8 جىلدان بەرى جالعاسىن تاۋىپ كەلەدى.