تٷلكٸباستىق باعباندار 25 مىڭ توننادان استام الما جينادى
تٷركٸستان وبلىسى, تٷلكٸباس اۋدانى – الما ٶسٸرۋگە ٶتە ىڭعايلى ايماق. اۋدان اۋماعىندا قازٸرگٸ تاڭدا 76 اگروقۇرىلىم الما باۋىن ٶسٸرۋمەن اينالىسادى. شارۋا قوجالىقتاردىڭ باسىم بٶلٸگٸ حالىق اراسىندا كٶپ سۇرانىسقا يە «گالا», «فۋدجي», «گولدەن دەليشەس», «ستار كريمسون», «لەگالينا», «ايدارەت» سىندى الما سۇرىپتارىن ٶسٸرەدٸ, – دەپ حابارلايدى Dalanews.kz تٷركٸستان وبلىسى ەكٸمٸنٸڭ باسپاسٶز قىزمەتٸنە سٸلتەمە جاساپ.
ٶتكەن جىلى تٷلكٸباستا الما ٶسٸرۋمەن اينالىساتىن شارۋالار 33 مىڭ توننادان استام الما جيناپ رەكوردتىق كٶرسەتكٸشكە قول جەتكٸزدٸ. ال بيىل ولار 25 مىڭ 600 توننا الما جيناپ وتىر.
بٷگٸنگٸ كٷندە تٷلكٸباس اۋداننىڭدا 3077 گەكتار الما باۋ القابى بار. ونىڭ ٸشٸندە 2218 گەكتارىنا 2007 جىلدان كەيٸن كٶشەت وتىرعىزىلعان. ياعني, جاس باۋلار.
سونىمەن قاتار اۋداندا از جەردەن مول ٶنٸم الۋعا (1 گەكتار جەردە 2000 دانا كٶشەتتەن اسا بۋدانداستىرىلعان الما اعاشتارى) بەيٸمدەلگەن قارقىندى باۋ شارۋاشىلىقتارى دامىپ كەلەدٸ. قازٸرگٸ تاڭدا اۋداندا قارقىندى الما باۋ كٶلەمٸ 300 گەكتاردان اسادى.
ايتا كەتەيٸك, اۋدان اۋماعىندا قىس مەزگٸلٸندە الما ساقتايتىن سيىمدىلىعى 12500 توننانى قۇرايتىن 7 جەمٸس-جيدەك قويماسى جۇمىس ٸستەيدٸ. بۇل قويمالار تٷلكٸباستىڭ برەندٸن جىلدىڭ تٶرت مەزگٸلٸندە قولجەتٸمدٸ باعادا ەلگە ۇسىنۋعا مٷمكٸندٸك بەرەدٸ.
