جاڭا اكىمدى اۋدان اكتيۆىنە وبلىس اكىمى تانىستىرىپ، جۇمىسىنا ساتتىلىك تىلەدى. الداعى ۋاقىتتا جۇزەگە اسىرۋدى قاجەت ەتەتىن ءبىرقاتار ماڭىزدى جوبالارعا باعىت بەردى.
تۇلكىباس اۋدانىنىڭ اكىمى قىزمەتىن ءۇش جىل اتقارىپ كەلگەن بايعۇت نۇرلان مارحابات ۇلى قىزمەتىنەن بوساتىلدى.
– ەل پرەزيدەنتى قاسىم-جومارت كەمەل ۇلى جەرگىلىكتى اكىمدەرگە قازىرگى زامان تالابىنا ساي جاڭا تالاپتار قويۋدا. ونىڭ باستىسى – تۇرعىنداردىڭ سۇراقتارىن ساپالى، ۋاقتىلى شەشۋ. اكىمدەر جاڭا فورماتتا، تۇرعىندارمەن تىكەلەي بايلانىستا جۇمىس ىستەۋى كەرەك.
وزدەرىڭىز بىلەسىزدەر، جۋىردا مەملەكەت باسشىسىنىڭ قاتىسۋىمەن ەلىمىزدىڭ الەۋمەتتىك-ەكونوميكالىق دامۋ ماسەلەلەرى جونىندەگى كەڭەيتىلگەن كەڭەس ءوتىپ، پرەزيدەنتىمىز دامۋ باعىتتارىن ايقىندادى. وسى باعىتتاعى جۇمىستارعا كۇش سالامىز.
تۇلكىباس – وبلىسىمىزداعى الەۋەتى جوعارى اۋداندارىنىڭ ءبىرى. اۋدانداعى ەلدى مەكەندەردىڭ باسىم بولىگى ينجەنەرلىك ينفراقۇرىلىممەن قامتاماسىز ەتىلگەن. جاڭادان تاعايىندالعان اۋدان اكىمىنە اۋداننىڭ ەكونوميكالىق ءوسىمىن قامتاماسىز ەتۋ بويىنشا ناقتى جوسپار ازىرلەۋدى، ينۆەستيسيا تارتىپ، جاڭا ءوندىرىس ورىندارىن اشۋدى، اۋدان تۇرعىندارىن جۇمىسپەن قامتاماسىز ەتۋدى، وندىرىلەتىن ءونىم كولەمىن ارتتىرۋ بويىنشا جۇمىستاردى جۇرگىزۋدى، تۋريزم يندۋسترياسىن دامىتۋدى تاپسىرامىن.
باستى ماقسات – اۋداننىڭ الەۋمەتتىك - ەكونوميكالىق دامۋىن قامتاماسىز ەتۋ، تۇرعىنداردىڭ ءومىر سۇرۋىنە قولايلى جاعداي جاساۋ. اۋىل، ەلدى مەكەندەرىمىز جايلى، ءقاۋىپسىز ءارى تازا بولۋى قاجەت، – دەدى دارحان ساتىبالدى.
نۇرجان ىزتىلەۋوۆ 1975 جىلى وڭتۇستىك قازاقستان وبلىسىندا تۋعان. ءبىلىمى جوعارى.
وڭتۇستىك قازاقستان تەحنيكالىق ۋنيۆەرسيتەتىن حالىقارالىق ەكونوميكالىق قاتىناستار ماماندىعى بويىنشا بىتىرگەن.
ەڭبەك جولىن حالىق جيناق بانكىنىڭ وڭتۇستىك قازاقستان وبلىستىق فيليالىندا باستاپ، جامبىل وبلىستىق فيليالىندا ءبولىم باستىعى جانە تۇلكىباس، ماقتاارال اۋداندىق فيليالدارىنىڭ باستىعى بولعان. سونىمەن قاتار «ەكسپرەسس بانك»، «اتف بانك» اكسيونەرلىك قوعامدارىنىڭ شىمكەنت قالاسىنداعى فيليالدارىندا باسشىلىق قىزمەتتەر اتقارعان.
تۇلكىباس اۋدانى، كەمەرباستاۋ اۋىلدىق وكرۋگىنىڭ اكىمى جانە التى جىل تۇلكىباس اۋدانى اكىمىنىڭ ورىنباسارى بولىپ قىزمەت اتقاردى.
تۇركىستان وبلىسىنىڭ ءبىلىم باسقارماسى باسشىسىنىڭ ورىنباسارى بولعان.
2020-شى جىلدان بۇگىنگى كۇنگە دەيىن تۇركىستان وبلىسىنىڭ تابيعي رەسۋرستار جانە تابيعات پايدالانۋدى رەتتەۋ باسقارماسى باسشىسىنىڭ ورىنباسارى بولىپ قىزمەت اتقاردى.
