تۇلكىباس اۋدانى قازىرگى تاڭدا 99،5% كوگىلدىر وتىنمەن قامتىلعان. اعىمداعى جىلى ءيىرسۋ اۋىلىندا قۇرىلىس جۇمىستارى باستالعان گاز قۇبىرى 2022 جىلى پايدالانۋعا بەرىلەتىن بولادى. ناتيجەسىندە اۋدان 100% تابيعي گازبەن قامتىلادى. بۇل تۋرالى اۋدان اكىمى نۇرلان بايعۇت مالىمدەدى، – دەپ حابارلايدى Dalanews.kz تۇركىستان وبلىسىنىڭ وڭىرلىك كوممۋنيكاسيالار قىزمەتىنە سىلتەمە جاساپ.

2021 جىلدىڭ 9 ايىنىڭ قورىتىندىسىمەن اۋدانداعى جالپى وڭىرلىك ءونىم كولەمى 58 ملرد 728،6 ملن تەڭگەنى قۇراعان. ال اۋدانعا تارتىلعان ينۆەستيسيالار كولەمى ەسەپتى كەزەڭدە 6 ملرد 871،1 ملن تەڭگەگە جەتكەن.

– اۋداننىڭ  الەۋمەتتىك-ەكونوميكالىق  دامۋىن  ارتتىرۋ  ماقساتىندا 1 ءىرى، 3  ورتا، 24  كىشى  جانە 4 قوسالقى  بارلىعى 32  كاسىپورىن  جۇمىس  ىستەيدى. ونىڭ  ىشىندە  بەلسەندى  جۇمىس اتقاراتىنى – 22، مەزگىلدى  جۇمىس  اتقاراتىنى – 10. 2021 جىلدىڭ 9 ايىنىڭ قورىتىندىسىمەن كاسىپورىندار 10 ملرد 203،8 ملن تەڭگەنىڭ  ءونىمىن  وندىرگەن. ال اۋىل شارۋاشىلىعى سالاسىنىڭ ءونىم كولەمى 9 ايدا 38 ملرد 16،6 ملن تەڭگەنى قۇرادى، – دەدى نۇرلان مارحابات ۇلى.

اۋداندا اعىمداعى جىلدىڭ 9 ايىنىڭ قورىتىندىسىمەن 18 509 شارشى مەتر تۇرعىن ءۇي پايدالانۋعا بەرىلگەن.

سونداي-اق، ايماقتا 36 تۋريستىك نىسان جۇمىس ىستەيدى. توعىز ايدا جالپى اۋدانعا 5 261 تۋريست كەلگەن. بۇگىنگى تاڭدا تۋريزم سالاسىن دامىتۋعا اۋدان بويىنشا 2 جوبا ىسكە اسىرىلۋدا. ولار: «Etno Park Resort» ەتنو اۋىل جوباسى مەن «تاڭ نۇرى» ج ش س ەمدەۋ ساۋىقتىرۋ كەشەنى.