اقش-تىڭ مەملەكەتتٸك قارجى ينستيتۋتتارى US EXIM مەن DFC ەزٸرگە قازاقستانداعى ۆولفرام كەن ورنىن يگەرۋگە 1,6 ميلليارد دوللار بٶلۋدەن باس تارتىپ وتىر, دەپ حابارلايدى dalanews.kz.
جوبانىڭ ەكونوميكالىق تيٸمدٸلٸگٸنە قاتىستى كٷمەن مەن گەوساياسي قاۋٸپ ۆاشينگتون ۇستانىمىن قايتا قاراۋىنا سەبەپ بولعان. اقش بيلٸگٸ قازاقستاننىڭ رەسەي مەن قىتايدىڭ ورتاسىندا ورنالاسقانىن دا ەسكەرٸپ وتىر.
جوسپار بويىنشا قارجىنىڭ 900 ميلليون دوللارىن US EXIM, ال 700 ميلليون دوللارىن DFC بٶلۋٸ كەرەك ەدٸ. بىلتىر ەكٸ ۇيىم دا جوباعا قىزىعۋشىلىق تانىتقان حات بەرگەن. الايدا بۇل قۇجاتتار قارجى مٸندەتتٸ تٷردە بٶلٸنەتٸنٸنە كەپٸلدٸك بەرمەگەن.
DFC ٶكٸلٸنٸڭ ايتۋىنشا, كورپوراتسييا قازٸر بۇل مەمٸلەنٸ بەلسەندٸ تٷردە قاراستىرىپ جاتقان جوق. جوبا باعالاۋدىڭ تٶرت كەزەڭٸنٸڭ بٸرٸنشٸسٸندە تۇر. ال US EXIM بەرگەن حاتتىڭ مەرزٸمٸ تامىزدا اياقتالعان. Cove Kaz كومپانيياسى ونىڭ مەرزٸمٸن ۇزارتۋدى سۇراعان. بانك بۇل جاعدايعا قاتىستى پٸكٸر بٸلدٸرمەدٸ.
كومپانييا ٶكٸلدەرٸ اقش شەنەۋنٸكتەرٸ جوبانى ەلٸ دە قولداپ وتىرعانىن ايتادى. ديرەكتورلار كەڭەسٸنٸڭ تٶراعاسى پيني التحاۋستىڭ سٶزٸنشە, قارجى بٶلۋ تۋرالى رەسمي ٶتٸنٸش 2027 جىلى تٷپكٸلٸكتٸ تەحنيكالىق-ەكونوميكالىق نەگٸزدەمە دايىن بولعان سوڭ بەرٸلەدٸ. وعان دەيٸن جوباعا قارىز قاراجاتى قاجەت ەمەس.
