اقش پرەزيدەنتى دونالد ترامپ رەسەي پرەزيدەنتى ۆلاديمير پۋتينمەن ساۋد ارابياسىندا كەزدەسەتىنى تۋرالى اقپارات تارادى، - دەپ حابارلايدى Dalanews.kz «ازاتتىققا» سىلتەپ.
«ءبىرىنشى كەزدەسۋدىڭ كۇنى ءالى بەلگىلەنگەن جوق، ءبىراق بۇل وتە ۇزاققا سوزىلمايدى»، – دەدى ترامپ جۋرناليستەرگە اق ۇيدەگى جۇمىس كابينەتىندە.
ترامپتىڭ سوزىنە قاراعاندا، كەيىن ول رەسەيگە، ال پۋتين اقش-قا بارۋى مۇمكىن. اقش پرەزيدەنتى ۋكرايناعا ساپار تۋرالى «بۇل تۋرالى ويلايتىن ەدىم» دەدى. ايتۋىنشا، ءوزى دە، پۋتين مەن ۋكراينا پرەزيدەنتى ۆلاديمير زەلەنسكيي دە بەيبىتشىلىكتى قالايدى.
بريفينگ الدىندا ترامپ پۋتينمەن ۋكرايناداعى قاقتىعىستى رەتتەۋ جايلى سويلەسكەن. رەسەي پرەزيدەنتىنىڭ باسپا ءسوز حاتشىسى دميتريي پەسكوۆتىڭ ايتۋىنشا، اڭگىمە ءبىر جارىم ساعاتقا سوزىلعان.
كەيىن ترامپ زەلەنسكييگە قوڭىراۋ شالعان. ترامپ ەكى اڭگىمەنى دە «تاماشا» دەپ باعالاعان.
ايتا كەتەيىك، بۇعان دەيىن حاماس پەن ءيزرايلدى كەلىسىمگە كەلتىرگەن ترامپتىڭ وكىلى ماسكەۋگە جەتكەنى ايتىلدى.
11 اقپاندا اقش پرەزيدەنتى دونالد ترامپتىڭ تاياۋ شىعىستاعى ارنايى وكىلى ستيۆ ۋيتكوففتىڭ ۇشاعى ماسكەۋگە قوندى دەگەن اقپارات تارادى.
رەسەي فەدەراسياسى پرەزيدەنتىنىڭ باسپا ءسوز حاتشىسى دميتريي پەسكوۆ كرەملدە ستيۆ ۋيتكوففتىڭ ماسكەۋگە كەلگەنى تۋرالى اقپارات جوق ەكەنىن مالىمدەدى.
«بىزدە ەشقانداي اقپارات جوق، كەزدەسۋ جوسپارلانباعان»، - دەدى پەسكوۆ جۋرناليستەرگە بۇعان دەيىن.
