قازاقستان قارجىگەرلەرى قاۋىمداستىعى دۇيسەنبىدەگى سەسسيا قورىتىندىسى بويىنشا مۇناي باعالارى اقش-تىڭ مەكسيكا مەن كانادا (25%)، سونداي-اق قحر (تاعى 10%) تاۋارلارىنا باج سالىعىن ەنگىزەر الدىندا قۇلدىراي جونەلگەنىن ايتادى. حالىقارالىق نارىقتا مۇنايدىڭ ءبىر باررەلى 2،1%-عا ارزانداپ، 71،6 دوللار بولدى، دەپ حابارلايدى Dalanews.kz.

"سونىمەن قاتار، وپەك + 1 ساۋىردەن باستاپ بۇعان دەيىن شەكتەپ كەلگەن مۇناي ءوندىرىسى كولەمىن بىرتىندەپ ۇلعايتۋدى جوسپارلاپ وتىرعاندارىن راستادى. مۇنداي جاعدايدا ءبىر ايدان كەيىن كارتەلدىڭ تاۋلىگىنە ساتۋعا ۇسىناتىن "قارا التىننىڭ" ورتاشا كولەمى 2،2 ملن باررەلگە ارتۋى مۇمكىن"، - دەپ جازادى ساراپشىلار.

ايتا كەتسەك،  4 ناۋرىزدان باستاپ اقش كانادالىق ەنەرگيا رەسۋرستاردى قوسپاعاندا، كانادا مەن مەكسيكادان يمپورتتالاتىن تاۋارلارعا 10% تاريف بەلگىلەدى. سونىمەن قاتار جۇڭگو تاۋارلارىنا ارنالعان باج كولەمىن 10% -دان 20%-عا دەيىن ءوسىردى، دەپ حابارلايدى Associated Press.

كانادا پرەمەر-ءمينيسترى دجاستين تريۋدو بۇعان جاۋاپ رەتىندە 21 كۇننەن كەيىن كۇشىنە ەنەتىن سوماسى 100 ميلليارد دوللاردان استام امەريكالىق تاۋارلارعا تاريفتەر ەنگىزگەنىن جاريالادى. جۇڭگو دا شالت ارەكەت ەتىپ، ءبىرقاتار امەريكالىق اۋىلشارۋاشىلىق جانە ازىق-تۇلىك ونىمدەرىنە يمپورتتىق باجداردى 10%-دان 15%-عا دەيىن كوتەرىپ، 25 امەريكالىق كومپانياعا ەكسپورتتىق جانە ينۆەستيسيالىق شەكتەۋلەر ەنگىزدى. مەكسيكا ازىرگە ءۇنسىز، ءبىراق ساراپشىلار ول تاراپتان دا ناقتى جاۋاپ بولاتىنىنا سەنىمدى. وسى جاعدايلار اياسىندا كانادالىق دوللار مەن مەكسيكالىق پەسو باعامى ءبىر ايلىق ەڭ تومەنگى دەڭگەيگە دەيىن تومەندەدى.

ترامپتىڭ شەشىمى ەكونوميستەر مەن ساياساتكەرلەر اراسىندا قاتتى الاڭداۋشىلىق تۋعىزۋدا. سەبەبى ينفلياسيانىڭ ىقتيمال ءوسىمى، جەتكىزىلىم تىزبەگىنىڭ بۇزىلۋى جانە اقش-تاعى ەكونوميكالىق جاعدايدىڭ ناشارلاۋى ىقتيمال دەگەن بولجامدار قىلاڭ بەرۋدە. دەگەنمەن، امەريكا پرەزيدەنتى ءوزىنىڭ ستراتەگياسىنا بەك سەنىمدى، سوندىقتان العان بەتىنەن قايتۋ ويى جوق. ول تاريفتەر بۇرىنعى ساياساتكەرلەردىڭ "ارامدىعى، اقىماقتىعى نەمەسە سىبايلاس جەمقورلىعى" كەسىرىنەن قولدانىلماي كەلگەن "قۋاتتى قارۋ" دەپ سانايدى.

اق ءۇي باج سالىعىن ەسىرتكى ترافيگىمەن جانە زاڭسىز كوشى-قونمەن كۇرەس رەتىندە تۇسىندىرەدى.

كەيبىر رەسپۋبليكاشىلار، سونىڭ ىشىندە سەناتور سيۋزان كوللينز تۋعان جەرى مەن شتاتىنىڭ ەكونوميكاسى كانادامەن تىعىز بايلانىستى بولعاندىقتان ءوز الاڭداۋشىلىعىن ءبىلدىردى. امەريكالىق كومپانيالار دا اۋىر زارداپتارعا ىشتەي دايىندالۋدا. ويىنشىق وندىرۋشىلەر قاۋىمداستىعىنىڭ پرەزيدەنتى گرەگ احەرن جۇڭگو تاۋارلارىنا سالىنعان 20 پايىزدىق باج سالىعى اتالعان سالا ءۇشىن "جويقىن" بولاتىنىن ايتتى، ويتكەنى امەريكالىق نارىقتاعى ويىنشىقتاردىڭ 80%-ى قىتايدا جاسالعان. ال ترامپتىڭ ءوزى بولسا، تاريفتەر اقش-قا شەتەلدىك كومپانيالاردى تارتادى دەپ سانايدى، ءبىراق ساراپشىلار فابريكالار قىتايلىق ءوندىرىستىڭ ورنىن تەز الماستىرا الاتىندىعىنا كۇمانمەن قارايدى.

بۇعان دەيىن وپەك+ ەلدەرى 1 ساۋىردەن باستاپ مۇناي ءوندىرىسىن بىرتىندەپ ۇلعايتا باستايتىنىن جازعانبىز.