اقتوبە وبلىسىندا ءتورت ادامنىڭ ولىمىنە اكەلگەن جول اپاتىنا قاتىستى ءىس بويىنشا قىرعىزستان ازاماتى اقتالدى، دەپ حابارلايدى Dala News.

اقتوبە وبلىسىنىڭ مامانداندىرىلعان اۋدانارالىق قىلمىستىق سوتى 33 جاستاعى قىرعىزستان ازاماتى رامازان ينفۋروۆتى قىلمىستىق قۇقىقبۇزۋشىلىق قۇرامى بولماعاندىقتان اقتاۋ تۋرالى شەشىم شىعاردى.

قايعىلى وقيعا 2023 جىلعى 21 اقپاندا سامارا – شىمكەنت اۆتوجولىنىڭ 921-شاقىرىمىندا بولعان. تەرگەۋ دەرەكتەرىنە سايكەس، ينفۋروۆ باسقارعان Volvo جۇك كولىگى مەن Mitsubishi Montero Sport جول تالعامايتىن كولىگى سوقتىعىسقان.

اپات سالدارىنان 31 جاستاعى ەر ادام مەن ونىڭ ەكى كىشكەنتاي بالاسى وقيعا ورنىندا قازا تاپقان، ال تاعى ءبىر بالا كەيىن اۋرۋحانادا كوز جۇمدى. جول تالعامايتىن كولىكتى باسقارعان 32 جاستاعى ايەل – مارقۇمنىڭ جۇبايى – امان قالعان.

العاشىندا ايەلگە ق ر قك 345-بابىنىڭ 4-بولىگى بويىنشا ايىپ تاعىلعان. الايدا ول ءوز كىناسىن مويىنداماي، قارسى جولاقتا بەنزوۆوزدى باسىپ وزعان جۇك كولىگى وزىنە ءقاۋىپ توندىرگەنىن ايتقان. ونىڭ سوزىنشە، سول ساتتە كولىكتى تەجەگەندە ماشينا تايىپ كەتىپ، سوقتىعىس ورىن العان.

سوت ايەلدىڭ كىناسىن دالەلدەيتىن ناقتى ايعاقتار جوق دەپ تانىپ، ونى اقتاعان.

كەيىن ءدال وسى ايىپ بويىنشا جۇك كولىگىنىڭ جۇرگىزۋشىسى رامازان ينفۋروۆ جاۋاپقا تارتىلدى. ول دا ايىپتى مويىنداماي، باسىپ وزۋدى اياقتاپ، ءوز جولاعىنا قايتا ورالعانىن، ال جول تالعامايتىن كولىك قارسى باعىتقا شىعىپ كەتكەنىن مالىمدەگەن.

ءىس القابيلەردىڭ قاتىسۋىمەن قارالدى. قورعاۋشى تاراپ جۇرگىزۋشىنىڭ كىناسىن دالەلدەيتىن ايعاقتار جەتكىلىكسىز ەكەنىن ايتقان.

سوت ناتيجەسىندە ينفۋروۆ تولىق اقتالىپ، ونىڭ زاڭسىز قىلمىستىق جاۋاپكەرشىلىككە تارتىلعانى ءۇشىن وتەماقى تالاپ ەتۋ قۇقىعى تانىلدى. سوت ونى قاماۋدان دەرەۋ بوساتۋ تۋرالى قاۋلى شىعاردى.

زارداپ شەككەن تاراپتىڭ 50 ملن تەڭگە كولەمىندەگى ازاماتتىق تالابى قاراۋسىز قالدىرىلدى. تاراپتارعا اپەللياسيالىق شاعىم بەرۋ ءۇشىن 15 تاۋلىك ۋاقىت بەرىلدى.

سونىمەن قاتار ءتوراعالىق ەتۋشى سۋديا يسمايلوۆا ءىس بويىنشا تەرگەۋ بارىسىندا قىلمىستىق-پروسەستىك زاڭناما تالاپتارىنىڭ بۇزىلعانىن اتاپ ءوتىپ، اقتوبە وبلىسىنىڭ پروكۋراتۋراسى مەن پوليسيا دەپارتامەنتىنىڭ باسشىلىعىنا جەكە قاۋلى جولدادى.