Aqtóbe oblysynda tórt adamnyń ólimine ákelgen jol apatyna qatysty is boiynsha Qyrǵyzstan azamaty aqtaldy, dep habarlaidy Dala News.
Aqtóbe oblysynyń mamandandyrylǵan aýdanaralyq qylmystyq soty 33 jastaǵy Qyrǵyzstan azamaty Ramazan Infýrovty qylmystyq quqyqbuzýshylyq quramy bolmaǵandyqtan aqtaý týraly sheshim shyǵardy.
Qaiǵyly oqiǵa 2023 jylǵy 21 aqpanda Samara – Shymkent avtojolynyń 921-shaqyrymynda bolǵan. Tergeý derekterine sáikes, Infýrov basqarǵan Volvo júk kóligi men Mitsubishi Montero Sport jol talǵamaityn kóligi soqtyǵysqan.
Apat saldarynan 31 jastaǵy er adam men onyń eki kishkentai balasy oqiǵa ornynda qaza tapqan, al taǵy bir bala keiin aýrýhanada kóz jumdy. Jol talǵamaityn kólikti basqarǵan 32 jastaǵy áiel – marqumnyń jubaiy – aman qalǵan.
Alǵashynda áielge QR QK 345-babynyń 4-bóligi boiynsha aiyp taǵylǵan. Alaida ol óz kinásin moiyndamai, qarsy jolaqta benzovozdy basyp ozǵan júk kóligi ózine qaýip tóndirgenin aitqan. Onyń sózinshe, sol sátte kólikti tejegende mashina taiyp ketip, soqtyǵys oryn alǵan.
Sot áieldiń kinásin dáleldeitin naqty aiǵaqtar joq dep tanyp, ony aqtaǵan.
Keiin dál osy aiyp boiynsha júk kóliginiń júrgizýshisi Ramazan Infýrov jaýapqa tartyldy. Ol da aiypty moiyndamai, basyp ozýdy aiaqtap, óz jolaǵyna qaita oralǵanyn, al jol talǵamaityn kólik qarsy baǵytqa shyǵyp ketkenin málimdegen.
Is alqabilerdiń qatysýymen qaraldy. Qorǵaýshy tarap júrgizýshiniń kinásin dáleldeitin aiǵaqtar jetkiliksiz ekenin aitqan.
Sot nátijesinde Infýrov tolyq aqtalyp, onyń zańsyz qylmystyq jaýapkershilikke tartylǵany úshin ótemaqy talap etý quqyǵy tanyldy. Sot ony qamaýdan dereý bosatý týraly qaýly shyǵardy.
Zardap shekken taraptyń 50 mln teńge kólemindegi azamattyq talaby qaraýsyz qaldyryldy. Taraptarǵa apelliatsiialyq shaǵym berý úshin 15 táýlik ýaqyt berildi.
Sonymen qatar tóraǵalyq etýshi sýdia Ismailova is boiynsha tergeý barysynda qylmystyq-protsestik zańnama talaptarynyń buzylǵanyn atap ótip, Aqtóbe oblysynyń prokýratýrasy men politsiia departamentiniń basshylyǵyna jeke qaýly joldady.
