بۇل تۋرالى مەملەكەت باسشىسىنىڭ باسپا ءسوز حاتشىسى بەرىك ءۋالي الەۋمەتتىك جەلىدە جازدى.
"پرەزيدەنت ماڭعىستاۋ وبلىسىنداعى ەرەكشە قورعالاتىن بوزجىرا تابيعات قورىعىنىڭ اۋماعىنا سالىناتىن جاڭا قوناق ءۇيدىڭ قۇرىلىسىنا قاتىستى قوعامنىڭ تەرىس پىكىرىن ەسكەرە وتىرىپ، ۇكىمەتكە وسى جوبانى قايتا قاراۋ جونىندە تاپسىرما بەردى"، دەلىنگەن جازبادا.
جەكە مەنشىك ينۆەستورلار اكىمدىكتىڭ قولداۋىمەن ماڭعىستاۋدىڭ باستى سيمۆولى سانالاتىن بوزجىرادا سافاري-قوناق ءۇي سالادى دەگەن حابار تاراي سالا قوعام بەلسەندىلەرى دۇرلىگۋدە. بىرەگەي تابيعي اۋماقتىڭ كەلبەتىن بۇزىپ، تاريحتان اقشا جاساماقشى دەگەندەر قۇرىلىستى توقتاتۋدى تالاپ ەتىپ جاتىر.
ەكولوگتار مەن قوعام بەلسەندىلەرى شاتقالعا قوناق ءۇي سالامىز دەگەن جىندىنىڭ ساندىراعى دەپ، قورىقتىڭ قۇرىپ كەتۋىنە الاڭداۋلى. قىزىل كىتاپقا ەنگەن ۋريال، قاراقۇيرىق پەن قاراقال سياقتى جانۋارلاردىڭ كوبەيۋىنە كەسىرىن تيگىزەدى ەكەن. باستى سەبەپ بوزجىرا تۇرعان ءۇستىرت يۋنەسكو تىزىمىنە ەنۋگە شاق تۇر. ال، يۋنەسكو-نىڭ باستى تالابى – بۇلىنبەگەن تابيعات ەكەنىن ەسكەرسەك، كوممەرسيالىق نىسان سالىنسا ۇيىمعا كىرگىزۋ جوسپارى قۇردىمعا كەتەدى دەيدى بەلسەندىلەر.
