بۇل تۋرالى پرەزيدەنت قۇقىق قورعاۋ قۇرىلىمدارى مەن قارجى نارىعىن قاداعالايتىن جانە مونيتورينگىلەيتىن مەملەكەتتىك ورگاندار باسشىلارىمەن وتكىزگەن كەڭەستە ايتتى.
جيىندا ەل ازاماتتارىنا ايتارلىقتاي ماتەريالدىق شىعىن كەلتىرگەن قارجى-نەسيە ۇيىمدارىنىڭ زاڭسىز قىزمەتىنە توسقاۋىل قويۋعا بايلانىستى ماسەلە قاراستىرىلدى.
قاسىم-جومارت توقايەۆ قوعامدا نارازىلىق تۋدىرعان جاعدايدى ەگجەي-تەگجەيلى تەكسەرۋدى، ازاماتتاردىڭ قۇقىقتارىنىڭ بۇزىلۋىنا جول بەرمەۋ ءۇشىن شارالار قابىلداۋدى جانە كىنالىلەردى جاۋاپقا تارتۋدى تاپسىردى.
مەملەكەت باسشىسى بولاشاقتا مۇنداي جاعدايعا جول بەرمەۋ كەرەكتىگىن جانە حالىقتىڭ قارجىلىق ساۋاتتىلىعىن ارتتىرۋ جۇمىستارىنىڭ ماڭىزدىلىعىن اتاپ ءوتتى.
سونىمەن قاتار كەڭەستە ەۋرازيالىق ەكونوميكالىق وداققا مۇشە ەلدەردەن ۇلتتىق زاڭنامالاردى بۇزا وتىرىپ اكەلىنگەن اۆتوكولىكتەردى تىركەۋ ماسەلەسى دە تالقىلاندى.
پرەزيدەنت ۇكىمەتكە قازاقستاننىڭ زاڭنامالارىن، مەملەكەتتىك بيۋدجەتتىڭ دە، اۆتوكولىك يەلەرىنىڭ دە مۇددەلەرىن ەسكەرە وتىرىپ، اتالعان پروبلەمانى شەشۋ نۇسقالارىن ازىرلەۋ جونىندە تاپسىرما بەردى.
ەسكە سالايىق، وتكەن اپتادا قازاقستاننىڭ بىرنەشە قالاسىندا تۇرعىندار الاياقتىق قۇربانى بولعانىن ايتىپ، پوليسياعا ارىز جازعان. وسىعان دەيىن اتىراۋ، پاۆلودار، اقتاۋ، شقو، تاراز جانە قاراعاندىداعى «گارانت-24 لومبارد» ج ش س ايماقتىق فيليالدارىنىڭ باسشىلارى ۇستالدى. ولاردىڭ ۇستىنەن «الاياقتىق» جانە «قارجى پيراميدالارىن قۇرۋ» باپتارى بويىنشا سوتقا دەيىنگى تەرگەۋ باستالدى.
