Bul týraly Prezıdent quqyq qorǵaý qurylymdary men qarjy naryǵyn qadaǵalaıtyn jáne monıtorıńileıtin memlekettik organdar basshylarymen ótkizgen keńeste aıtty.
Jıynda el azamattaryna aıtarlyqtaı materıaldyq shyǵyn keltirgen qarjy-nesıe uıymdarynyń zańsyz qyzmetine tosqaýyl qoıýǵa baılanysty másele qarastyryldy.
Qasym-Jomart Toqaev qoǵamda narazylyq týdyrǵan jaǵdaıdy egjeı-tegjeıli tekserýdi, azamattardyń quqyqtarynyń buzylýyna jol bermeý úshin sharalar qabyldaýdy jáne kinálilerdi jaýapqa tartýdy tapsyrdy.
Memleket basshysy bolashaqta mundaı jaǵdaıǵa jol bermeý kerektigin jáne halyqtyń qarjylyq saýattylyǵyn arttyrý jumystarynyń mańyzdylyǵyn atap ótti.
Sonymen qatar keńeste Eýrazıalyq ekonomıkalyq odaqqa múshe elderden ulttyq zańnamalardy buza otyryp ákelingen avtokólikterdi tirkeý máselesi de talqylandy.
Prezıdent Úkimetke Qazaqstannyń zańnamalaryn, memlekettik búdjettiń de, avtokólik ıeleriniń de múddelerin eskere otyryp, atalǵan problemany sheshý nusqalaryn ázirleý jóninde tapsyrma berdi.
Eske salaıyq, ótken aptada Qazaqstannyń birneshe qalasynda turǵyndar alaıaqtyq qurbany bolǵanyn aıtyp, polısıaǵa aryz jazǵan. Osyǵan deıin Atyraý, Pavlodar, Aqtaý, SHQO, Taraz jáne Qaraǵandydaǵy «Garant-24 Lombard» JSHS aımaqtyq fılıaldarynyń basshylary ustaldy. Olardyń ústinen «Alaıaqtyq» jáne «qarjy pıramıdalaryn qurý» baptary boıynsha sotqa deıingi tergeý bastaldy.
