بەرليندەگى باسقوسۋ بارىسىندا مەملەكەت باسشىسى رەسەيگە سالىنعان سانكسيالارعا توقتالىپ، «قازاقستانعا قاتىستى كۇدىك بولماۋى ءتيىس» دەگەن ەدى.
"قازاقستان سانكسيالىق ءتارتىپتى ۇستاناتىنىن شەگەلەپ ايتتى. ءبىز سانكسيانى ساقتاۋ بويىنشا ءتيىستى ۇيىمدارمەن بايلانىستامىز. بەرليننىڭ سانكسيانى اينالىپ وتۋگە باعىتتالعان ىقتيمال ارەكەتتەرگە قاتىستى قانداي دا ءبىر كۇمانى بولماۋى ءتيىس"، – دەگەن بولاتىن توقايەۆ.
پرەزيدەنتتىڭ مالىمدەمەسى رەسەيلىك اقپارات قۇرالدارىنىڭ نازارىنا ىلىگىپ، ايىپتاۋ سارىنىنداعى ماتەريالدار جارىق كورە باستادى. «استانا ماسكەۋدەن ىرگەسىن اۋلاق سالىپ، بىرتىندەپ باتىسقا بەت بۇرۋدا...» دەگەن ريتوريكا كۇشەيە ءتۇستى.
وسىعان وراي قويىلعان «قازاقپاراتتىڭ» ساۋالىنا پرەزيدەنت توقايەۆ كەلەسىدەي جاۋاپ قاتتى.
«قازاقستان «انتيرەسەي» ەمەس. ەكى ەلدىڭ شەكاراسى جەتى مىڭ شاقىرىمعا سوزىلىپ جاتىر. رەسەيمەن جان-جاقتى، سان-سالالى ارىپتەستىك ورناتۋ ۇستانىمىنان اينىعان جوقپىز. ساۋدا جانە گۋمانيتارلى بايلانىستان بولەك، وزگە سالالاردا دا ەرتەدەن كەلە جاتقان ساباقتاستىق بار»، - دەدى پرەزيدەنت.
توقايەۆتىڭ اتاپ وتكەنىندەي سانكسيالىق تەكەتىرەستىڭ ءتۇبى تۇيىققا تىرەيدى.
«مەن بۇل تۋرالى بۇۇ-نىڭ باس اسسەمبلەياسىندا ەگجەي-تەگجەيلى ايتقانمىن. سانكسيالىق شايقاس حالىقارالىق قارىم-قاتىناستىڭ ىرگەتاسىن شايقالتىپ، وسى كۇنگە دەيىنگى اتقارىلعان شارۋانى ەروزياعا ۇشىراتادى.
قازاقستان سانكسيالىق تىزىمگە ەنگەن تاۋارلاردى الىپ-ساتۋمەن اينالىسپايتىنىن باسا ايتقىم كەلەدى! تيىسىنشە، رەسەيگە باعىتتالعان پارالەللدى يمپورتقا دا ءبىزدىڭ قاتىسىمىز جوق»، – دەدى كەسىپ ايتتى مەملەكەت باسشىسى.
دەسە دە، ءداستۇرلى تاۋار نارىعىندا رەسەيمەن اراداعى ساۋدا-ساتتىقتىڭ كولەمى ارتىپ كەلەدى. توقايەۆتىڭ ءمالىم ەتكەنىندەي بىلتىر بۇل كورسەتكىش 25 ملرد دوللارعا جەتىپ جىعىلعان. تۇنەۋكۇنى استانادا وتكەن «ءيننووندىرىس» كورمەسىنە پرەمەر ميشۋستين باستاعان رەسەي دەلەگاسياسى ارنايى كەلگەن.
«الايدا»، - دەيدى توقايەۆ. قازاقستان سانكسيالىق شەكتەۋلەر مەن تىيىمداردى قاپەرگە الۋعا ءماجبۇر. بۇل ماسەلەدە حالىقارالىق ۇيىمدارمەن ۇدايى بايلانىستامىز.
وسى ءساتتى پايدالانىپ، بارشا ديپلوماتتارعا ءۇن قاتقىم كەلەدى: رەسەي مەن ۋكراينانىڭ مۇددەسىنە ساي كەلەتىن، كەلىسسوز تەتىگىن تابۋ قاجەت. بۇل ماسەلەنى كەيىنگە شەگەرۋگە بولمايدى. ادامزات بالاسى ءقاۋىپتى وتكەلدىڭ تابالدىرىعىندا تۇر»، – دەدى توقايەۆ.
ايتا كەتەيىك، پرەزيدەنت رەسمي ساپارمەن گەرمانياعا باردى. قاسىم-جومارت توقايەۆ گەرمانيا كانسلەرى ولاف شولسپەن كەزدەستى. جوعارى دەڭگەيدە وتكەن كەلىسسوزدەردەن كەيىن ەكى ەل باسشىسى بۇقارالىق اقپارات قۇرالدارى ءۇشىن بىرلەسكەن مالىمدەمە جاساعان.
اتاپ ايتقاندا، مەملەكەت باسشىسىنا قازاقستاننىڭ رەسەيمەن قارىم-قاتىناسى جونىندە، ۋكراينا توڭىرەگىندەگى قاقتىعىستارعا قاتىستى سۇراقتار قويىلعان.
«رەسەي دە، ۋكراينا دا كەلىسسوز جۇرگىزۋگە دايىن ەكەنىن راستايدى. الايدا كەلىسسوزدىڭ قانداي الاڭدا جۇرگىزىلەتىنى ازىرشە بەلگىسىز. سوندىقتان پاراساتتى، سالماقتى، ساليقالى ديپلوماتيانىڭ كەزەڭى تۋادى دەپ ويلايمىن.
ولار ءبىرىن-بىرى ايىپتاۋدى دوعارىپ، ەكى جاققا دا ءتيىمدى كەلىسسوزدىڭ جولىن تابۋى كەرەك.
قازاقستان ۋكراينا قاقتىعىسىن شەشۋدىڭ قانداي دا ءبىر جولدارىن ۇسىنىپ جاتقان وزگە ەلدەر مەن مەملەكەتتەر توبىنىڭ كۇش-جىگەرىن قولدايدى. ءبىز ءوز تاراپىمىزدان بارلىق قاجەتتى شارانى قابىلدايمىز»، – دەدى قاسىم-جومارت توقايەۆ.
