قاسىم-جومارت توقايەۆ يران پرەزيدەنتى يبراحيم ءرايسيدىڭ قايتىس بولۋىنا بايلانىستى كوڭىل ايتۋ جەدەلحاتىن جولدادى، دەپ حابارلايدى Dalanews.kz.
مەملەكەت باسشىسى يران يسلام رەسپۋبليكاسىنىڭ پرەزيدەنتى يبراحيم رايسي مەن ۇكىمەتتىك دەلەگاسيا مۇشەلەرىنىڭ شىعىس ازەربايجان پروۆينسياسىندا تىكۇشاق اپاتى سالدارىنان قايتىس بولۋىنا بايلانىستى قازاقستان حالقىنىڭ جانە جەكە ءوزىنىڭ اتىنان وسى ەلدىڭ جوعارى ليدەرى ءالي حامەنەي مەن ءبىرىنشى ۆيسە-پرەزيدەنتى موحامماد موحبەرگە جانە بارشا يران حالقىنا كوڭىل ايتتى.
"تىكۇشاق اپاتى سالدارىنان يران يسلام رەسپۋبليكاسىنىڭ پرەزيدەنتى يبراحيم رايسي مەن ونىڭ سەنىمدى سەرىكتەرىنىڭ قايتىس بولعانى تۋرالى سۋىت حاباردى تەرەڭ كۇيزەلىسپەن قابىل الدىم. يبراحيم رايسي – يران مەملەكەتى مەن حالقىنىڭ ءال-اۋقاتىن ارتتىرۋعا، مۇددەسىنىڭ مۇقالماۋىنا، ايماقتاعى تۇراقتىلىقتى ساقتاۋعا ءوز ءومىرىن رياسىز ارناعان كورنەكتى مەملەكەت قايراتكەرى. ونىڭ قولعا العان باستامالارى مەن جەتىستىكتەرى حالىقارالىق قاۋىمداستىق تاراپىنان جوعارى باعالانعانى بارشاعا ءمالىم. قازاقستاندىقتار يبراحيم ءرايسيدى پاراساتتى باسشى، حالىقارالىق دەڭگەيدەگى بەدەلدى ساياساتكەر، ەكىجاقتى ىنتىماقتاستىقتى نىعايتۋعا زور ەڭبەك سىڭىرگەن تۇلعا رەتىندە ءاردايىم ەسىندە ساقتايدى. مارقۇمداردىڭ جاتقان جەرى جايلى، توپىراعى تورقا بولسىن"، – دەپ جازىلعان جەدەلحاتتا.
ەسكە سالايىق، بۇگىن 20 مامىردا يران پرەزيدەنتى تىكۇشاق اپاتىنان قازا تاپتى. بۇل تۋرالى شەتەلدىك بۇقارالىق اقپارات قۇرالدارى حابارلادى.
اپات بولعان تىكۇشاقتا يران پرەزيدەنتى ەبراگيم رايسي مەن ەلدىڭ سىرتقى ىستەر ءمينيسترى حوسەين امير-ابدوللاحيان دە بولعان. قايعىلى وقيعا جەكسەنبى كۇنى بولعان.
تىكۇشاق شىعىس ازەربايجان پروۆينسياسىندا قالىڭ ورمان اراسىندا اپاتقا ۇشىراعان.
ۇشاقتا پرەزيدەنت پەن مينيستردەن بولەك بىرنەشە شەنەۋنىك بولعان.
قۇتقارۋشىلار اۋا رايىنىڭ قولايسىزدىعىنا قاراماستان ءتۇنى بويى تىكۇشاقتى ىزدەۋ جۇمىستارىمەن اينالىستى. ولار دۇيسەنبى تاڭەرتەڭ اپات بولعان ورىندى تاپتى.
بۇعان دەيىن Press TV تەلەارناسى تىكۇشاق تۇرىكتىڭ Akıncı قۇرىلعىسى ارقىلى تابىلعانىن حابارلاعان بولاتىن.
