Qasym-Jomart Toqaev Iran Prezidenti Ibrahim Raisidiń qaitys bolýyna bailanysty kóńil aitý jedelhatyn joldady, dep habarlaidy Dalanews.kz.
Memleket basshysy Iran Islam Respýblikasynyń Prezidenti Ibrahim Raisi men úkimettik delegatsiia músheleriniń Shyǵys Ázerbaijan provintsiiasynda tikushaq apaty saldarynan qaitys bolýyna bailanysty Qazaqstan halqynyń jáne jeke óziniń atynan osy eldiń Joǵary lideri Áli Hamenei men Birinshi Vitse-Prezidenti Mohammad Mohberge jáne barsha iran halqyna kóńil aitty.
"Tikushaq apaty saldarynan Iran Islam Respýblikasynyń Prezidenti Ibrahim Raisi men onyń senimdi serikteriniń qaitys bolǵany týraly sýyt habardy tereń kúizelispen qabyl aldym. Ibrahim Raisi – Iran memleketi men halqynyń ál-aýqatyn arttyrýǵa, múddesiniń muqalmaýyna, aimaqtaǵy turaqtylyqty saqtaýǵa óz ómirin riiasyz arnaǵan kórnekti memleket qairatkeri. Onyń qolǵa alǵan bastamalary men jetistikteri halyqaralyq qaýymdastyq tarapynan joǵary baǵalanǵany barshaǵa málim. Qazaqstandyqtar Ibrahim Raisidi parasatty basshy, halyqaralyq deńgeidegi bedeldi saiasatker, ekijaqty yntymaqtastyqty nyǵaitýǵa zor eńbek sińirgen tulǵa retinde árdaiym esinde saqtaidy. Marqumdardyń jatqan jeri jaily, topyraǵy torqa bolsyn", – dep jazylǵan jedelhatta.
Eske salaiyq, búgin 20 mamyrda Iran prezidenti tikushaq apatynan qaza tapty. Bul týraly sheteldik buqaralyq aqparat quraldary habarlady.
Apat bolǵan tikushaqta Iran prezidenti Ebragim Raisi men eldiń syrtqy ister ministri Hosein Amir-Abdollahian de bolǵan. Qaiǵyly oqiǵa jeksenbi kúni bolǵan.
Tikushaq Shyǵys Ázerbaijan provintsiiasynda qalyń orman arasynda apatqa ushyraǵan.
Ushaqta prezident pen ministrden bólek birneshe sheneýnik bolǵan.
Qutqarýshylar aýa raiynyń qolaisyzdyǵyna qaramastan túni boiy tikushaqty izdeý jumystarymen ainalysty. Olar dúisenbi tańerteń apat bolǵan oryndy tapty.
Buǵan deiin Press TV telearnasy tikushaq túriktiń Akinci qurylǵysy arqyly tabylǵanyn habarlaǵan bolatyn.
