قازاقستان پرەزيدەنتى قاسىم-جومارت توقايەۆتىڭ سينحۋا اگەنتتىگىنە بەرگەن سۇحباتى جاريا بولدى. Dalanews.kz ءتىلشىسى سۇحباتتىڭ قىسقاشا نۇسقاسىن ۇسىنادى.
پرەزيدەنت قازاقستان قىتايمەن تىعىز ارىپتەستىكتى جوعارى باعالايتىنىن اتاپ وتكەن.
"ءبىزدىڭ قارىم-قاتىناسىمىز بەرىك دوستىق، ورتاق تاريح پەن تاتۋ كورشىلىككە نەگىزدەلگەن. 2022 جىلدىڭ قىركۇيەگىندە دوسىم، جۇڭگو حالىق رەسپۋبليكاسىنىڭ ءتوراعاسى سي سزينپين مىرزامەن قازاقستانعا مەملەكەتتىك ساپارى بارىسىندا ءبىز ەكىجاقتى ىنتىماقتاستىقتىڭ جاڭا "التىن 30 جىلدىعىن" باستادىق.
جۇڭگو باسشىسىنىڭ پاندەميادان كەيىنگى العاشقى شەتەلدىك ساپارىنىڭ استانادا بولعانى قۋانتادى. بۇل بەيجىڭنىڭ سىرتقى ساياساتىنداعى قازاقستانمەن قارىم-قاتىناستىڭ باسىمدىلىعىن تاعى دا راستايدى"، دەيدى پرەزيدەنت.
سونىمەن قاتار، پرەزيدەنت قىتايمەن نە بايلانىستىراتىنىن ايتتى.
"وسى جىلدار ىشىندە ارامىزدا قالىپتاسقان شىنايى دوستىق جانە سەنىمدى قارىم-قاتىناستار جاڭا ۇلى ماقساتتارعا قول جەتكىزۋگە ىقپال ەتەدى.قۇرمەتتى ءتوراعا سي سزينپينمەن كەزدەسۋلەرىمىزدى جىلى ەسكە الامىن. اشىق جانە سەنىمدى اتموسفەرادا ءبىز وزەكتى ماسەلەلەر مەن ماڭگىلىك جان-جاقتى ستراتەگيالىق ارىپتەستىگىمىزدى نىعايتۋ پەرسپەكتيۆالارىن تالقىلاپ، الەمدەگى جاعداي تۋرالى پىكىر الماسامىز.
راسىندا كەيدە اڭگىمە بارىسىندا جۇڭگو تىلىندە سويلەيمىن، سەبەبى ارىپتەسىمە ەرەكشە ماڭىزدى ويلاردى مۇمكىندىگىنشە ءدال جەتكىزۋ ءۇشىن، كۇندەلىكتى ومىردەگى قىزىقتى تاقىرىپتاردى تالقىلاعىم كەلەدى.ستۋدەنتتىك ومىردەگى ەڭ جارقىن ەستەلىكتەر مەن ديپلوماتيالىق مانسابىمنىڭ باستالۋى قىتايمەن بايلانىستى. جالپى قىتايدا 8 جىل تۇردىم. وسى ۋاقىت ىشىندە مەن جۇڭگو مادەنيەتىن، تاريحىن، ءتىلى مەن ادەت-عۇرپىن زەرتتەۋگە تەرەڭ بويلاپ، جۇڭگو تاعامدارىنىڭ بايلىعى مەن الۋان تۇرلىلىگىن ءبىلدىم"، دەيدى پرەزيدەنت.
سۇحبات بارىسىندا پرەزيدەنت ەكى ەل اراسىنداعى ءوزارا ءتيىمدى پراكتيكالىق ىنتىماقتاستىق تۋرالى ويىن ايتتى. ول قازاقستان مەن جۇڭگو الداعى ۋاقىتتا قانداي سالالارداعى ىنتىماقتاستىقتى دامىتۋى مۇمكىن ەكەنىن ايتتى.
"32 جىلدىق تابىستى ەكىجاقتى ىنتىماقتاستىقتىڭ قۋاتتى نەگىزىن قالاعانىمىزدى ەسكەرە وتىرىپ، قازاقستان تاتۋ كورشىلىك قارىم-قاتىناستاردى ودان ءارى نىعايتۋ، الماسۋلاردى جانداندىرۋ جانە پراكتيكالىق ءوزارا ءىس-قيمىلدى تەرەڭدەتۋ ءۇشىن بار كۇش-جىگەرىن سالۋعا دايىن. سوندىقتان وسى كەزەڭدە بەس باعىت بويىنشا بىرلەسىپ جۇمىس ىستەۋ وتە ماڭىزدى.
ينۆەستيسيالىق سالاداعى ىنتىماقتاستىقتى تەرەڭدەتۋ. اۋىل شارۋاشىلىعى، جاڭا ەنەرگەتيكا، اۆتوموبيل ونەركاسىبى سياقتى سالالارعا ەرەكشە نازار اۋدارۋ كەرەك. سونداي-اق يندۋستريالاندىرۋ مەن قوسىلعان قۇنى جوعارى ءونىم وندىرۋگە دەن قويۋ قاجەت.
(...)
ەكى ەل اراسىنداعى كولىك ىنتىماقتاستىعىن كەڭەيتۋ. بۇگىندە دوستىق-مويىنتى تەمىرجول ۋچاسكەسىندە ەكىنشى جولداردىڭ قۇرىلىسى جالعاسۋدا. سونىمەن قاتار، ورتاق شەكارامىزدا 3ء-شى تەمىرجول بەكەتىنىڭ قۇرىلىسى باستالادى دەپ جوسپارلانۋدا.
مادەني-گۋمانيتارلىق سالادا كوپ قىرلى ءوزارا ءىس-قيمىلدى جانداندىرۋ. ءبىز ورناتقان ۆيزاسىز تاجىريبە، مادەني ورتالىقتاردىڭ، لۋ بان شەبەرحانالارىنىڭ، ۋنيۆەرسيتەتتەردىڭ فيليالدارىنىڭ ءوزارا اشىلۋى، سونداي-اق رەيستەردى كوبەيتۋ بويىنشا تۇراقتى جۇمىس ءبىزدىڭ ەلدەرىمىز اراسىنداعى ءوزارا تۇسىنىستىك پەن دوستىقتى ودان ءارى نىعايتۋ جولىنداعى ماڭىزدى قادامدار بولاتىنىنا سەنىمدىمىن.
ءبىزدىڭ ەلدەرىمىز قازاقستان مەن جۇڭگو اراسىنداعى قارىم-قاتىناستىڭ جاڭا «التىن 30 جىلدىعى» اياسىندا ءبىزدى جارقىن بولاشاق جولىندا بىرىكتىرەتىن ۇلكەن جەتىستىكتەر مەن جەڭىستەردىڭ باستاۋىندا دەپ سەنىممەن ايتۋعا بولادى"، دەيدى پرەزيدەنت.
ەسكە سالايىق،2-4 شىلدە كۇندەرى پرەزيدەنت قاسىم-جومارت توقايەۆتىڭ شاقىرۋىمەن جۇڭگو حالىق رەسپۋبليكاسىنىڭ ءتوراعاسى سي سزينپين قازاقستانعا مەملەكەتتىك ساپارمەن كەلەدى. سونداي-اق شانحاي ىنتىماقتاستىق ۇيىمىنا مۇشە مەملەكەتتەر باسشىلارى كەڭەسىنىڭ 24ء-شى وتىرىسىنا قاتىسادى.
