Qazaqstan prezidenti Qasym-Jomart Toqaevtyń Sinhýa agenttigine bergen suhbaty jariia boldy. Dalanews.kz tilshisi suhbattyń qysqasha nusqasyn usynady.
Prezident Qazaqstan Qytaimen tyǵyz áriptestikti joǵary baǵalaitynyn atap ótken.
"Bizdiń qarym-qatynasymyz berik dostyq, ortaq tarih pen tatý kórshilikke negizdelgen. 2022 jyldyń qyrkúieginde dosym, Qytai Halyq Respýblikasynyń Tóraǵasy Si Tszinpin myrzamen Qazaqstanǵa memlekettik sapary barysynda biz ekijaqty yntymaqtastyqtyń jańa "altyn 30 jyldyǵyn" bastadyq.
Qytai basshysynyń pandemiiadan keiingi alǵashqy sheteldik saparynyń Astanada bolǵany qýantady. Bul Beijińniń syrtqy saiasatyndaǵy Qazaqstanmen qarym-qatynastyń basymdylyǵyn taǵy da rastaidy", deidi prezident.
Sonymen qatar, prezident Qytaimen ne bailanystyratynyn aitty.
"Osy jyldar ishinde aramyzda qalyptasqan shynaiy dostyq jáne senimdi qarym-qatynastar jańa uly maqsattarǵa qol jetkizýge yqpal etedi.Qurmetti Tóraǵa Si Tszinpinmen kezdesýlerimizdi jyly eske alamyn. Ashyq jáne senimdi atmosferada biz ózekti máseleler men máńgilik jan-jaqty strategiialyq áriptestigimizdi nyǵaitý perspektivalaryn talqylap, álemdegi jaǵdai týraly pikir almasamyz.
Rasynda keide áńgime barysynda qytai tilinde sóileimin, sebebi áriptesime erekshe mańyzdy oilardy múmkindiginshe dál jetkizý úshin, kúndelikti ómirdegi qyzyqty taqyryptardy talqylaǵym keledi.Stýdenttik ómirdegi eń jarqyn estelikter men diplomatiialyq mansabymnyń bastalýy Qytaimen bailanysty. Jalpy Qytaida 8 jyl turdym. Osy ýaqyt ishinde men Qytai mádenietin, tarihyn, tili men ádet-ǵurpyn zertteýge tereń boilap, qytai taǵamdarynyń bailyǵy men alýan túrliligin bildim", deidi prezident.
Suhbat barysynda prezident eki el arasyndaǵy ózara tiimdi praktikalyq yntymaqtastyq týraly oiyn aitty. Ol Qazaqstan men Qytai aldaǵy ýaqytta qandai salalardaǵy yntymaqtastyqty damytýy múmkin ekenin aitty.
"32 jyldyq tabysty ekijaqty yntymaqtastyqtyń qýatty negizin qalaǵanymyzdy eskere otyryp, Qazaqstan tatý kórshilik qarym-qatynastardy odan ári nyǵaitý, almasýlardy jandandyrý jáne praktikalyq ózara is-qimyldy tereńdetý úshin bar kúsh-jigerin salýǵa daiyn. Sondyqtan osy kezeńde bes baǵyt boiynsha birlesip jumys isteý óte mańyzdy.
Investitsiialyq saladaǵy yntymaqtastyqty tereńdetý. Aýyl sharýashylyǵy, jańa energetika, avtomobil ónerkásibi siiaqty salalarǵa erekshe nazar aýdarý kerek. Sondai-aq indýstriialandyrý men qosylǵan quny joǵary ónim óndirýge den qoiý qajet.
(...)
Eki el arasyndaǵy kólik yntymaqtastyǵyn keńeitý. Búginde Dostyq-Moiynty temirjol ýchaskesinde ekinshi joldardyń qurylysy jalǵasýda. Sonymen qatar, ortaq shekaramyzda 3-shi temirjol beketiniń qurylysy bastalady dep josparlanýda.
Mádeni-gýmanitarlyq salada kóp qyrly ózara is-qimyldy jandandyrý. Biz ornatqan vizasyz tájiribe, mádeni ortalyqtardyń, Lý Ban sheberhanalarynyń, ýniversitetterdiń filialdarynyń ózara ashylýy, sondai-aq reisterdi kóbeitý boiynsha turaqty jumys bizdiń elderimiz arasyndaǵy ózara túsinistik pen dostyqty odan ári nyǵaitý jolyndaǵy mańyzdy qadamdar bolatynyna senimdimin.
Bizdiń elderimiz Qazaqstan men Qytai arasyndaǵy qarym-qatynastyń jańa «altyn 30 jyldyǵy» aiasynda bizdi jarqyn bolashaq jolynda biriktiretin úlken jetistikter men jeńisterdiń bastaýynda dep senimmen aitýǵa bolady", deidi prezident.
Eske salaiyq,2-4 shilde kúnderi Prezident Qasym-Jomart Toqaevtyń shaqyrýymen Qytai Halyq Respýblikasynyń Tóraǵasy Si Tszinpin Qazaqstanǵa memlekettik saparmen keledi. Sondai-aq Shanhai yntymaqtastyq uiymyna múshe memleketter basshylary keńesiniń 24-shi otyrysyna qatysady.
