ۇلتتىق قۇرىلتاي وتىرىسىندا پرەزيدەنت قاسىم-جومارت توقايەۆ QazaqGaz ۇلتتىق كومپانياسىنىڭ جۇمىسىنا قاتاڭ سىن ايتتى، دەپ حابارلايدى Dalanews.kz.
مەملەكەت باسشىسىنىڭ ايتۋىنشا، كومپانيا گاز ءوندىرۋ كولەمى بويىنشا ءتيىستى دەڭگەيدە جۇمىس ىستەمەي وتىر. قازىرگى تاڭدا QazaqGaz بار بولعانى 350 ميلليون تەكشە مەتر گاز ءوندىرىپ وتىر، ال كومپانياداعى قىزمەتكەرلەر سانى 10 مىڭ ادامعا جۋىق. سونىمەن قاتار جاڭا كەن ورىندارىن يگەرۋ ءىسى دە ءتيىمسىز جۇرگىزىلۋدە.
پرەزيدەنت بۇل جاعدايدى باسقارۋداعى ولقىلىقتارمەن بايلانىستىردى.
«قالىپتاسقان احۋال - ءتيىمسىز جوسپارلاۋدىڭ تىكەلەي سالدارى. بۇل مۇلدە جول بەرۋگە بولمايتىن جاعداي. بۇدان ساباق الۋ كەرەك. QazaqGaz باسشىلىعىنا پەرسپەكتيۆالى ۋچاسكەلەردى ءوز قاراجاتى ەسەبىنەن يگەرۋگە كىرىسۋ جونىندە ناقتى تاپسىرما بەردىم»، - دەدى قاسىم-جومارت توقايەۆ.
سونداي-اق مەملەكەت باسشىسى ۇكىمەت پەن «سامۇرىق-قازىنا» قورىنا گاز سالاسىنداعى جۇمىستى نەعۇرلىم ۇتىمدى ۇيىمداستىرۋدى تاپسىردى.
پرەزيدەنتتىڭ ايتۋىنشا، گاز سەكتورىنداعى باسقارۋ تاسىلدەرى قايتا قارالىپ، ۇلتتىق كومپانيالاردىڭ تيىمدىلىگى ناقتى ناتيجەمەن باعالانۋى ءتيىس.
بۇعان دەيىن قازاقستاننىڭ پرەمەر-مينيسترى ولجاس بەكتەنوۆ «QazaqGaz» ۇلتتىق كومپانياسى» اق باسقارما ءتوراعاسى سانجار جاركەشوۆتىڭ تىم وڭ باعىتتاعى بايانداماسىن سىنعا العان بولاتىن.
ۇكىمەت وتىرىسىندا كومپانيا باسشىسى نەگىزگى جەتىستىكتەر مەن ىسكە اسىرىلىپ جاتقان جوبالاردى تانىستىرىپ، گاز سالاسىن سيفرلاندىرۋ مەن تۇراقتى دامىتۋ باعىتىنا باسىمدىق بەرىلىپ جاتقانىن اتاپ ءوتتى. سانجار جاركەشوۆتىڭ ايتۋىنشا، پيلوتتىق جوبالار ناتيجەسىندە شىمكەنت قالاسىندا گاز تۇتىنۋشىلارىنىڭ 98 پايىزى سيفرلاندىرىلعان، ال الداعى ۋاقىتتا تالداۋ جۇرگىزۋ ءۇشىن جاساندى ينتەللەكتىنى قولدانۋ جوسپارلانىپ وتىر.
سونىمەن قاتار ونىڭ سوزىنشە، گەولوگيالىق بارلاۋ جانە بۇرعىلاۋ جۇمىستارىنا ينۆەستيسيالار تارتىلىپ، جامبىل وبلىسىندا جاڭا گاز قورى انىقتالعان.
الايدا پرەمەر-مينيستر ولجاس بەكتەنوۆ باياندامانى جەتكىلىكسىز دەپ باعالاپ، سىن ايتتى.
«سىزدەردە پروبلەمالىق ماسەلەلەر مۇلدە جوق پا؟ تەك وڭ ناتيجەلەردى عانا كورسەتتىڭىزدەر. ماسەلەلەر تۋرالى كوبىرەك ايتۋ كەرەك. ولاردى اشىق كوتەرىپ، تالقىلاۋ قاجەت»، – دەدى پرەمەر-مينيستر.
بۇعان جاۋاپ رەتىندە سانجار جاركەشوۆ قاشاعان گاز وڭدەۋ زاۋىتىنداعى قازىرگى جاعداي تۋرالى قوسىمشا بايانداما جاسادى.
