پرەزيدەنت پىكىرىنشە بۇكىل مەم.اپپارات باسقارۋدىڭ بۇرىنعى ادىس-تاسىلدەرىنەن ارىلىپ، جاڭا جاعدايعا بەيىمدەلۋى كەرەك. ايتپەسە ورنىن بوساتادى.
"قالىپتاسقان جاعدايدا مەملەكەتتى باسقارۋدىڭ جولدارىن تۇبەگەيلى وزگەرتۋ قاجەت. مەملەكەتتىك ماڭىزى بار شەشىم قابىلدايتىن تۇلعالار وز-وزىنە جاۋاپكەرشىلىك الا ءبىلىپ، باتىل، ءارى ناتيجەلى شەشىم شىعارۋى كەرەك.
داعدارىس سالدارىمەن كۇرەسۋ ءۇشىن مەملەكەتتىك باسقارۋ جۇيەسىنە شۇعىل شەشىم قابىلدايتىن قۇقىق بەرەتىن قاۋلى قابىلدادىم.
بۇدان بىلاي مەم.ورگاندار كەز-كەلگەن ماسەلەنى قاراستىراردا ءوز الەۋەتىنە سەنىپ، ءوز كوزقاراسى نەگىزىندە شەشىم قابىلداي الادى. بۇل ءبىرىنشى كەزەكتە بيۋدجەت پروسەسى، باعا باقىلاۋى، مەملەكەتتىك ساتىپ الۋ، جەڭىلدىك بەرۋ سەكىلدى ماسەلەلەرگە قاتىستى"، – دەيدى توقايەۆ.
پرەزيدەنت ۇكىمەت مۇشەلەرى مەن اكىمدەرگە بىركەزدەگى جايباراقات ءومىردىڭ كەلمەسكە كەتكەنىن ەسكە الىپ، مۇلدە باسقا جاعدايدا جۇمىس ىستەيتىن كەز كەلگەنىن ەسكەرتتى.
"قازىرگى جاعدايعا ءجۇردىم-باردىم قاراپ، باياعى اۋەنىنە باسىپ، ەشنارسەنى وزگەرتكىسى كەلمەي، ەسكى تاسىلمەن باسقارا بەرگەندى ۇناتاتىن، ەلدەن بۇرىن، جەكە باسىنىڭ مۇددەسىن جوعارى قوياتىن مينيسترلەر مەن اكىم-قارالار ورنىن بوساتادى.
بۇيتپەسەك بۇل داعدارىستى ەڭسەرە المايمىز. مينيسترلەر مەن اكىمدەر شاپشاڭ قيمىلداۋى قاجەت"، – دەيدى توقايەۆ.
پرەزيدەنت مەم.باسقارۋداعى وزگەرىستەردى جىلدامداتىپ ەنگىزىپ، داعدارىسقا قارسى شارا قابىلداۋدى ۇكىمەت باسشىسىنا تاپسىردى.
