"قىركۇيەك ايىندا الماتىدا بولعان تراگەديا قوعامدى ءدۇر سىلكىندىردى. بۇل ەش سەبەپپەن اقتاپ الۋعا بولمايتىن قىلمىس. ءبىز بارلىق ماسەلەلەر قاتاڭ تۇردە زاڭعا سايكەس شەشىلۋى كەرەك قۇقىقتىق مەملەكەتتە ءومىر ءسۇرىپ جاتىرمىز. ءوز بەتىنشە جازا قۇراستىرۋعا ەشكىمنىڭ قۇقى جوق.
بۇل قايعىلى جاعداي قارىز الۋشىلاردىڭ قارىز مىندەتتەمەلەرىن ورىنداماۋ ماسەلەسىن جۇيەلى تۇردە شەشۋ قاجەتتىگىن، مۇلىكتى الۋ مەن ىسكە اسىرۋدىڭ جەتىلمەگەندىگىن، اشىق ەمەستىگىن، بانكتەردىڭ كەپىلگە سالىنعان جىلجىمايتىن مۇلىكتى دۇرىس باعالاماۋىن كورسەتەدى"، - دەدى مەملەكەت باسشىسى.
قازىرگى تاڭدا قازاقستاندا 540 مىڭ ادامنىڭ 90 كۇننەن استام مەرزىمى وتكەن بەرەشەگى بار. جالپى كولەمى – 354 ملرد تەڭگە. وسىعان بايلانىستى پرەزيدەنت قارجى سەكتورىنا نۇقسان كەلتىرمەي قارىز الۋشىلاردى قولداۋ شارالارىن قابىلداۋ قاجەتتىگىن ايتتى.
"قارجى سەكتورىنا زيان كەلتىرمەي، قارىز الۋشىلاردى قولداۋ ءۇشىن سارالانعان شارالار قابىلداۋ قاجەت. ەكىنشى دەڭگەيلى بانكتەردىڭ كەپىل ساياساتى يكەمدىلىگىن قامتاماسىز ەتىپ، باعالاۋ قىزمەتىن رەتتەۋدى كۇشەيتۋ كەرەك. قارىز الۋشىعا كەپىلدەگى مۇلكىن ماجبۇرلەپ ءوندىرۋ شاراسى قولدانىلعانعا دەيىن ءۇش اي ىشىندە ءوز بەتىنشە ساتۋ قۇقىعىن بەرۋ كەرەك.
ەگەر قارىز الۋشىنىڭ ساتىلعان مۇلىگى نەگىزگى بورىشتى وتەۋگە جەتپەسە، قالعان بەرەشەك ەسەپتەن شىعارىلۋى كەرەك. ەگەر مەرزىمى وتكەن بەرەشەكتىڭ مولشەرى ونىڭ باعالاۋ قۇنىنىڭ 15%-ىنان از بولسا، كەپىل مۇلكىن ءوندىرىپ الۋدى شەكتەۋ قاجەت. ال مەرزىمىن وتكىزىپ الۋ – 6 ايدان اسپاۋى كەرەك. ءبىراق بۇل ءۇشىن بورىشكەردىڭ باسقا مۇلكى بولماۋى كەرەك جانە تابىسى ەڭ تومەنگى ايلىق ەسەپتىڭ كورسەتكىشتىڭ ەكى ەسەلەنگەن مولشەرىنەن اسپاعانى ءجون"، - دەدى پرەزيدەنت"، - دەدى توقايەۆ.
سونداي-اق توقايەۆ اۋكسيوندىق ساۋدا-ساتتىقتىڭ اشىقتىعى مەن ادىلدىگىن قامتاماسىز ەتۋ قاجەت ەكەنىنە توقتالدى.
"اۋكسيونعا شىعارىلعان كەپىلدەگى مۇلىك باعالاۋ قۇنىنىڭ 70%-ىنەن تومەن باعاعا ساتىلماۋعا ءتيىس. مۇنداي ساۋدا-ساتتىققا كەپىل ۇستاۋشىلاردى، ياعني بانكتەردى، ولاردىڭ قىزمەتكەرلەرىن، ۇلەستەس جانە سەنىمدى تۇلعالارىن جىبەرۋگە بولمايدى. ساۋدا-ساتتىققا بورىشكەر مەن جاقىن تۋىسقاندارىنىڭ ءبىر مەزەتتە قاتىسۋىن بولدىرماۋ كەرەك"، - دەدى توقايەۆ.
بۇدان بولەك، ول باعالاۋشىعا قويىلاتىن تالاپتاردى قاتاڭداتۋ كەرەك ەكەنىن اتاپ ءوتتى. ايتۋىنشا، ولاردىڭ جۇمىس تاجىريبەسى ءۇش جىلدان كەم بولماۋى كەرەك. سونىمەن قاتار باعالاۋشىلار ءار ءۇش جىل سايىن بىلىكتىلىكتى ارتتىرۋ كۋرستارىنان وتۋگە ءتيىس.
توقايەۆ ۇكىمەت پەن ۇلتتتىق بانككە جىل سوڭىنا دەيىن ءتيىستى زاڭنامالىق نورمالار پاكەتىن ازىرلەۋدى تاپسىردى.
