مەملەكەت باسشىسى تۋريزم جانە سپورت ءمينيسترى ەربول مىرزابوسىنوۆتى قابىلداپ، بىرنەشە تاپسىرما بەرىپ، تانىمالدىعى ارتىپ كەلە جاتقان پادەل سپورتىنا نازار اۋدارۋدى سۇرادى، - دەپ حابارلايدى Dalanews.kz.
الدىمەن مينيستر ەربول مىرزابوسىنوۆ پرەزيدەنتكە اتقارىلعان جۇمىستار جايلى ەسەپ بەردى:
- وتاندىق سپورت سالاسىن كەشەندى رەفورمالاۋ جونىندە بۇعان دەيىن بەرىلگەن پرەزيدەنت تاپسىرمالارىنىڭ ورىندالۋ بارىسىن باياندادى؛
- بالالار مەن جاسوسپىرىمدەر سپورتىن دامىتۋ، تورەشىلەر مەن ماماندار بىلىكتىلىگىن ارتتىرۋ، لەگيونەر سانىن ازايتۋ، فەدەراسيالار جۇمىسىن وڭتايلاندىرۋ باعىتىندا اتقارىلعان جۇمىستار تۋرالى ەسەپ بەردى:
- سالاعا ۆەرتيكالدى باسقارۋ جۇيەسىن ەنگىزۋ شارالارى باستالعان. وسى ماقساتتا مينيسترلىك جانىنان ارنايى قۇرىلعان توپ مۇشەلەرى وڭىرلەردەگى سپورت سالاسىنىڭ جاعدايىنا جان-جاقتى تالداۋ جۇرگىزگەن؛
- قولدانىستاعى "دەنە شىنىقتىرۋ جانە سپورت تۋرالى"زاڭعا نەگىزگى باسىمدىقتاردى ايقىندايتىن وزگەرىستەر مەن تولىقتىرۋلار ەنگىزۋ ءۇشىن جۇمىس توبى قۇرىلعان؛
- حالىقارالىق فەدەراسيالارمەن ىنتىماقتاستىق اياسىن كەڭەيتۋ، سپورت ينفراقۇرىلىمدارىن جەتىلدىرۋ ءۇشىن جۇيەلى جۇمىس جۇرگىزىلىپ جاتىر؛
ەلىمىزدىڭ تۋريستىك الەۋەتىن ارتتىرۋ شارالارى تۋرالى مالىمەت بەردى: - شەتەلدىك ساياحاتشىلارعا ءتۇرلى مۇمكىندىكتەر ۇسىناتىن Neo Nomad Visa جوباسى ىسكە قوسىلعان؛
- پرەزيدەنت تاپسىرماسىنا سايكەس الماتى تاۋ كلاستەرىن، ماڭعىستاۋ جانە بۋراباي كۋرورتى ايماقتارىندا جاعاجاي ءتۋريزمىن دامىتۋ جونىندە كەشەندى جوسپار ازىرلەنىپ جاتىر؛
- ويىن بيزنەسىن جانە لوتەرەيانى رەتتەۋ كوميتەتى قۇرىلىپ، لۋدومانياعا قارسى كۇرەس قولعا الىنعان.
قاسىم-جومارت توقايەۆ مينيسترگە سپورت جانە تۋريزم سالالارىن ودان ءارى جەتىلدىرۋ جونىندە ءبىرقاتار ناقتى مىندەت جۇكتەدى. اتاپ ايتقاندا، الداعى ۋاقىتتا وتەتىن حالىقارالىق سپورت دودالارىنا دايىندىق دەڭگەيىن پىسىقتاۋدى، سونداي-اق ەلىمىزدە تانىمالدىعى ارتىپ كەلە جاتقان پادەل سپورتىن ىلگەرىلەتۋگە نازار اۋدارۋدى تاپسىردى.
