مەملەكەت باسشىسى قاسىم-جومارت توقايەۆ حالىقارالىق جاستار كۇنىنە ارنالعان Jastar Fest فورۋمىنا قاتىسۋشىلارعا ۇندەۋ جولدادى، - دەپ حابارلايدى Dalanews.kz.
"قۇرمەتتى جاستار، فورۋمعا قاتىسۋشىلار! ءقادىرلى قاۋىم! حالىقارالىق جاستار كۇنى بارشاڭىزعا قۇتتى بولسىن! بۇل – ءمان-ماعىناسى ەرەكشە مەرەكە. بۇگىن وسىندا ناعىز وتانشىل، دارىندى جانە جاناشىر جاستار جينالدى. ءتۇرلى كاسىپتى مەڭگەرگەن ازاماتتار باس قوسىپ وتىر. حالقىمىز قاشاندا تالاپتى جاستاردى قولداعان. "اقىل جاستان" دەپ ولارعا زور سەنىم ارتقان. سىزدەر بارلىق سالادا بەلسەندى تۇردە ەڭبەك ەتىپ جاتسىزدار. ۆولونتەر رەتىندە مۇقتاج جاندارعا كومەك بەرىپ جۇرسىزدەر. ماڭىزدى باستامالارعا، ەكولوگيالىق ءىس-شارالارعا اتسالىسىپ، قولداۋ كورسەتىپ كەلەسىزدەر. سپورت، ءبىلىم سايىستارىندا توپ جارىپ، ەلدىڭ ابىرويىن كوتەرىپ جۇرسىزدەر. وسىلايشا، ادىلەتتى، تازا ءارى قۋاتتى قازاقستاندى قۇرۋعا ناقتى ۇلەس قوسىپ جاتسىزدار. مەن بارشاڭىزعا شىنايى ريزاشىلىعىمدى بىلدىرەمىن!" - دەدى پرەزيدەنت.
جاستار فورۋمى پاۆلودار قالاسىندا ءوتىپ جاتىر.
"بۇل ايماق – ۇلت رۋحانياتىن بايىتۋعا ولشەۋسىز ەڭبەك سىڭىرگەن كورنەكتى تۇلعالاردىڭ مەكەنى. سونداي-اق، پاۆلودار – ەلىمىزدەگى ونەركاسىپ ورتالىعىنىڭ ءبىرى. وبلىستىڭ ەكونوميكامىزدى وركەندەتۋگە قوسقان ۇلەسى زور. ايماق تۇرعىندارى ءوندىرىس، شارۋاشىلىق جانە باسقا دا سالادا ادال ەڭبەك ەتىپ كەلەدى. ەلىمىزدى كوركەيتۋگە اتسالىسىپ ءجۇر. جاستارىمىز ولاردان ۇلگى-ونەگە الىپ، وبلىستى ودان ءارى دامىتىپ، جاڭا ماقساتتارعا جەتۋ ءۇشىن قىزمەت ەتۋى كەرەك. ەڭبەكقورلىق پەن ءبىلىمپازدىق، جاناشىرلىق پەن جاۋاپكەرشىلىك – ەڭ اسىل قاسيەتتەر. بيىل – قازاقستاندا جۇمىسشى ماماندىقتارى جىلى. وسىعان وراي ءبىز اۋقىمدى شارالاردى قولعا الدىق. ەلىمىزدە ەڭبەك ادامىنا ءاردايىم ەرەكشە قۇرمەت كورسەتىلۋى كەرەك. مۇنى وسكەلەڭ ۇرپاقتىڭ ساناسىنا ءسىڭىرۋ ماڭىزدى، سەبەبى ەڭبەك – ءاربىر ادامنىڭ ءومىرىنىڭ تۇعىرى، قوزعاۋشى كۇشى. ەڭبەكسىز ەشقانداي دامۋ، وركەندەۋ بولمايدى. بۇل باستامانىڭ ءمان-ماڭىزى دا وسىندا"، - دەدى مەملەكەت باسشىسى.
