Memleket basshysy Qasym-Jomart Toqaev Halyqaralyq jastar kúnine arnalǵan Jastar Fest forýmyna qatysýshylarǵa úndeý joldady, - dep habarlaidy Dalanews.kz.
"Qurmetti jastar, forýmǵa qatysýshylar! Qadirli qaýym! Halyqaralyq jastar kúni barshańyzǵa qutty bolsyn! Bul – mán-maǵynasy erekshe mereke. Búgin osynda naǵyz otanshyl, daryndy jáne janashyr jastar jinaldy. Túrli kásipti meńgergen azamattar bas qosyp otyr. Halqymyz qashanda talapty jastardy qoldaǵan. "Aqyl jastan" dep olarǵa zor senim artqan. Sizder barlyq salada belsendi túrde eńbek etip jatsyzdar. Volonter retinde muqtaj jandarǵa kómek berip júrsizder. Mańyzdy bastamalarǵa, ekologiialyq is-sharalarǵa atsalysyp, qoldaý kórsetip kelesizder. Sport, bilim saiystarynda top jaryp, eldiń abyroiyn kóterip júrsizder. Osylaisha, Ádiletti, Taza ári Qýatty Qazaqstandy qurýǵa naqty úles qosyp jatsyzdar. Men barshańyzǵa shynaiy rizashylyǵymdy bildiremin!" - dedi Prezident.
Jastar forýmy Pavlodar qalasynda ótip jatyr.
"Bul aimaq – ult rýhaniiatyn baiytýǵa ólsheýsiz eńbek sińirgen kórnekti tulǵalardyń mekeni. Sondai-aq, Pavlodar – elimizdegi ónerkásip ortalyǵynyń biri. Oblystyń ekonomikamyzdy órkendetýge qosqan úlesi zor. Aimaq turǵyndary óndiris, sharýashylyq jáne basqa da salada adal eńbek etip keledi. Elimizdi kórkeitýge atsalysyp júr. Jastarymyz olardan úlgi-ónege alyp, oblysty odan ári damytyp, jańa maqsattarǵa jetý úshin qyzmet etýi kerek. Eńbekqorlyq pen bilimpazdyq, janashyrlyq pen jaýapkershilik – eń asyl qasietter. Biyl – Qazaqstanda Jumysshy mamandyqtary jyly. Osyǵan orai biz aýqymdy sharalardy qolǵa aldyq. Elimizde eńbek adamyna árdaiym erekshe qurmet kórsetilýi kerek. Muny óskeleń urpaqtyń sanasyna sińirý mańyzdy, sebebi eńbek – árbir adamnyń ómiriniń tuǵyry, qozǵaýshy kúshi. Eńbeksiz eshqandai damý, órkendeý bolmaidy. Bul bastamanyń mán-mańyzy da osynda", - dedi Memleket basshysy.
