وبلىس باسشىسى ا. باتالوۆ كوپشىلىكتىڭ الدىندا پرەزيدەنتتىڭ العىس حاتىن وقىپ بەردى. «ارمان باقىتباي ۇلى! ءسىز ادام ومىرىنە قاتەر تونگەندە شۇعىل شەشىم قابىلداپ، اسقان باتىلدىق كورسەتكەن ەرجۇرەك ازامات رەتىندە تانىلدىڭىز. ءورت قۇشاعىندا قالعان ءبۇلدىرشىندى جانقيارلىقپەن قۇتقارىپ، ەرەن ەرلىكتىڭ ۇلگىسىن كورسەتە ءبىلدىڭىز. زامانداستارىڭىزعا ۇلگى بولارلىق ەرجۇرەكتىگىڭىز بەن وجەتتىگىڭىز ءۇشىن سىزگە العىسىمدى ءبىلدىرىپ، بولاشاقتا ءوز ءىسىنىڭ بىلگىر مامانى، وتانىمىزدىڭ ناعىز پاتريوتى بولاتىنىڭىزعا سەنىم بىلدىرەمىن» دەلىنگەن ماتىندە.
ءى. جانسۇگىروۆ اتىنداعى جەتىسۋ ۋنيۆەرسيتەتىنىڭ دەنە شىنىقتىرۋ جانە سپورت فاكۋلتەتىنىڭ 3 كۋرسىندا وقيتىن ارمانمەن تىلدەسىپ، وتباسىنىڭ جاعدايىن، وقۋىنىڭ جايىن سۇراعان وبلىس اكىمى:
– سەنىڭ باتىل ارەكەتىڭ تۋرالى ەستىپ، بىلگەن پرەزيدەنت قاسىم-جومارت كەمەل ۇلى العىسىن جولداپ، ءىسىڭدى ەرلىكتىڭ جارقىن ۇلگىسى دەپ باعالادى. ءقازىر ءوزىڭ سپورتتىق باعىتتا ءبىلىم الىپ ءجۇرسىڭ، ءاردايىم رۋحىڭ مىقتى بولسىن! قانداي كومەك قاجەت بولسا، مەن ءاردايىم قولداۋعا ءازىرمىن. ونى بۇعان دەيىن دە وزىڭمەن كەزدەسكەندە ايتقانمىن. وسىنداي جاستاردى جان-جاقتى ناسيحاتتاپ، وزگەلەرگە ۇلگى ەتىپ كورسەتە ءبىلۋىمىز كەرەك، – دەدى ا. باتالوۆ.
ءوز كەزەگىندە مۇنداي ۇلكەن ءىلتيپاتقا قۋانىشىن بىلدىرگەن ارمان باقىتباي ۇلى ەشكىمنىڭ دە باتىر بولىپ تۋمايتىنىن، ونى وسكەن ورتاسى، كورگەن تاربيەسى بويىنا سىڭىرەتىنىن اتاپ ءوتتى.
– دەگەنمەن ءوزىمدى ەرلىك جاسادىم دەپ ەسەپتەمەيمىن. مەنىڭ ورنىمدا بولسا، ءار ادام وسىلاي جاسار ەدى. مۇنى قوعامنىڭ ءبىر مۇشەسى رەتىندە وزگە جاندارعا پايدامدى تيگىزگەن ازاماتتىق پارىزىم دەپ بىلەمىن. پرەزيدەنتتەن العىس الامىن دەپ كۇتكەن جوقپىن. مەملەكەت باسشىسىنا وسىنداي قۇرمەت كورسەتكەنى ءۇشىن ريزاشىلىعىمدى بىلدىرەمىن، – دەدى ارمان باقىتباي ۇلى.
ەسكە سالساق، 2019 جىلدىڭ ناۋرىز ايىندا تالدىقورعان قالاسىنىڭ تۇرعىنى، ستۋدەنتى ارمان باقىتباي ۇلى كوشەدەن ءوتىپ بارا جاتىپ كوپ پاتەرلى ءۇيدىڭ ەكىنشى قاباتىنان كومەككە شاقىرعان داۋىستى ەستيدى، تەرەزەدەن ءتۇتىن شىعىپ جاتقانىن كورەدى. ارمان گاز قۇبىرىمەن ورمەلەپ، ەسىگى جابىق پاتەردىڭ ىشىنەن تەرەزەدەن ەكى كىشكەنتاي قىزدى الىپ شىققان. كىشكەنتاي بالالاردى اتا-اناسى سىرتىنان جاۋىپ، جۇمىسقا كەتكەن ەكەن. وقيعا ورنىنا ءورت سوندىرۋشىلەر دەر كەزىندە جەتىپ، قاجەتتى كومەك كورسەتكەن. بۇدان سوڭ وبلىس اكىمى ا.باتالوۆ ارمان باقىتبايۇلىن جەكە قابىلداپ، ءى.جانسۇگىروۆ اتىنداعى جەتىسۋ ۋنيۆەرسيتەتىندەگى اقىلى وقۋىن وبلىس اكىمىنىڭ گرانتىنا اۋىستىرعان بولاتىن.
