Oblys basshysy A. Batalov kópshiliktiń aldynda Prezidenttiń Alǵys hatyn oqyp berdi. «Arman Baqytbaiuly! Siz adam ómirine qater tóngende shuǵyl sheshim qabyldap, asqan batyldyq kórsetken erjúrek azamat retinde tanyldyńyz. Órt qushaǵynda qalǵan búldirshindi janqiiarlyqpen qutqaryp, eren erliktiń úlgisin kórsete bildińiz. Zamandastaryńyzǵa úlgi bolarlyq erjúrektigińiz ben ójettigińiz úshin Sizge alǵysymdy bildirip, bolashaqta óz isiniń bilgir mamany, Otanymyzdyń naǵyz patrioty bolatynyńyzǵa senim bildiremin» delingen mátinde.
I. Jansúgirov atyndaǵy Jetisý ýniversitetiniń dene shynyqtyrý jáne sport fakýltetiniń 3 kýrsynda oqityn Armanmen tildesip, otbasynyń jaǵdaiyn, oqýynyń jaiyn suraǵan oblys ákimi:
– Seniń batyl áreketiń týraly estip, bilgen Prezident Qasym-Jomart Kemeluly alǵysyn joldap, isińdi erliktiń jarqyn úlgisi dep baǵalady. Qazir óziń sporttyq baǵytta bilim alyp júrsiń, árdaiym rýhyń myqty bolsyn! Qandai kómek qajet bolsa, men árdaiym qoldaýǵa ázirmin. Ony buǵan deiin de ózińmen kezdeskende aitqanmyn. Osyndai jastardy jan-jaqty nasihattap, ózgelerge úlgi etip kórsete bilýimiz kerek, – dedi A. Batalov.
Óz kezeginde mundai úlken iltipatqa qýanyshyn bildirgen Arman Baqytbaiuly eshkimniń de batyr bolyp týmaitynyn, ony ósken ortasy, kórgen tárbiesi boiyna sińiretinin atap ótti.
– Degenmen ózimdi erlik jasadym dep eseptemeimin. Meniń ornymda bolsa, ár adam osylai jasar edi. Muny qoǵamnyń bir múshesi retinde ózge jandarǵa paidamdy tigizgen azamattyq paryzym dep bilemin. Prezidentten alǵys alamyn dep kútken joqpyn. Memleket basshysyna osyndai qurmet kórsetkeni úshin rizashylyǵymdy bildiremin, – dedi Arman Baqytbaiuly.
Eske salsaq, 2019 jyldyń naýryz aiynda Taldyqorǵan qalasynyń turǵyny, stýdenti Arman Baqytbaiuly kósheden ótip bara jatyp kóp páterli úidiń ekinshi qabatynan kómekke shaqyrǵan daýysty estidi, terezeden tútin shyǵyp jatqanyn kóredi. Arman gaz qubyrymen órmelep, esigi jabyq páterdiń ishinen terezeden eki kishkentai qyzdy alyp shyqqan. Kishkentai balalardy ata-anasy syrtynan jaýyp, jumysqa ketken eken. Oqiǵa ornyna órt sóndirýshiler der kezinde jetip, qajetti kómek kórsetken. Budan soń oblys ákimi A.Batalov Arman Baqytbaiulyn jeke qabyldap, I.Jansúgirov atyndaǵy Jetisý ýniversitetindegi aqyly oqýyn oblys ákiminiń grantyna aýystyrǵan bolatyn.
