مەملەكەت باسشىسى قاسىم-جومارت توقايەۆ 2025 جىلى 15 ساۋىردە ەۋرازيالىق دامۋ بانكىنىڭ باسقارما ءتوراعاسى نيكولاي پودگۋزوۆتى قابىلدادى، دەپ حابارلايدى Dalanews.kz اقوردانىڭ باسپا ءسوز قىزمەتىنە سىلتەمە جاساپ.
قاسىم-جومارت توقايەۆ ەادب باسشىسىمەن كەزدەسىپ، حالىقارالىق قارجى ينستيتۋتىنىڭ جۇمىس ناتيجەسى مەن الداعى جوسپارىن تالقىلادى.
2024 جىلدىڭ قورىتىندىلارى:
- بانك قازاقستان ەكونوميكاسىنا 1،4 ملرد دوللار قارجى سالدى؛
- ينۆەستيسيا پورتفەلىندەگى قازاقستاندىق جوبالاردىڭ ۇلەسى 60%-عا جەتتى.
ينۆەستيسيا:
- بانك ەلىمىزگە 2022-2026 جىلدارعا ارنالعان ستراتەگيا اياسىندا 3،8 ملرد دوللار ينۆەستيسيا قۇيۋ جوسپارىن مەرزىمىنەن بۇرىن ورىندادى.
2025 جىلعا جوسپار:
- جالپى سوماسى 4،5 ملرد دوللاردان اساتىن جوبالار ۇسىنىلدى؛
- مىنا سالالارعا 1 ملرد دوللاردان استام ينۆەستيسيا سالۋ كوزدەلگەن:
- ەنەرگەتيكالىق نىسانداردى جاڭعىرتۋ؛
- جاڭارتىلاتىن ەنەرگيا كوزدەرى؛
- كولىك جانە لوگيستيكا سالالارىن دامىتۋ؛
- رەسپۋبليكالىق ماڭىزى بار جولداردى جوندەۋ؛
- ينفراقۇرىلىم نىساندارىنىڭ قۇرىلىسى؛
- ونەركاسىپ جانە سيفرلىق تەحنولوگيالار.
قارجى نارىعىن دامىتۋ
نيكولاي پودگۋزوۆ ەادب سەرىكتەستەرمەن جانە كوپجاقتى ۇيىمدارمەن تىعىز قارىم-قاتىناستا جۇمىس ىستەپ، سونداي-اق وزدەرى ۇيىمداستىراتىن حالىقارالىق ءىس-شارالار ارقىلى قازاقستاننىڭ قارجى نارىعىن دامىتۋ جانە ينۆەستيسيا تارتۋ ىسىنە بەلسەندى اتسالىسۋعا نيەتتى ەكەنىن ايتتى.
مەملەكەت باسشىسى بانكتىڭ قازاقستان ەكونوميكاسىن دامىتۋعا قوسقان ۇلەسىن جوعارى باعالاپ، ىنتىماقتاستىقتى ودان ءارى نىعايتۋعا بەيىل ەكەنىن راستادى.
ايتا كەتسەك، ەۋرازيالىق دامۋ بانكى – ينۆەستيسيالىق قىزمەتىن ەۋرازيا كەڭىستىگىندە جۇرگىزەتىن كوپجاقتى دامۋ بانكى. شتاب-پاتەرى الماتى قالاسىندا ورنالاسقان. 2025 جىلعى جاعداي بويىنشا، ەادب پورتفەلىنە جالپى ينۆەستيسيا سوماسى 16،5 ملرد دوللاردى قۇرايتىن 305 جوبا ەنگەن. نەگىزگى باعىتتارى: كولىك ينفراقۇرىلىمى، سيفرلاندىرۋ، جاسىل ەنەرگەتيكا، اۋىل شارۋاشىلىعى، ونەركاسىپ جانە ماشينا جاساۋ.
