توقاەۆ بانكتەردٸ شارۋالارعا ۇزاق مەرزٸمدٸ نەسيە بەرۋگە شاقىردى

توقاەۆ بانكتەردٸ شارۋالارعا ۇزاق مەرزٸمدٸ نەسيە بەرۋگە شاقىردى
فوتو: اقوردا

پرەزيدەنت قاسىم-جومارت توقاەۆ بانكتەر اۋىل شارۋاشىلىعى سالاسىنداعى كەسٸپكەرلەرگە قولايلى شارتتارمەن ۇزاق مەرزٸمدٸ نەسيە بەرۋٸ كەرەك ەكەنٸن جەتكٸزدٸ, دەپ حابارلايدى dalanews.kz.

مەملەكەت باسشىسىنىڭ سٶزٸنشە, قارىزدى ٶتەۋ كەستەسٸ ەگٸن جيناۋ ناۋقانىنا بەيٸمدەلۋگە تيٸس. ال ينۆەستيتسييالىق جوبالاردى قارجىلاندىرۋ كەزٸندە شارۋالارعا نەگٸزگٸ قارىزدى تٶلەۋدٸ كەيٸنگە قالدىرۋ مٷمكٸندٸگٸن قاراستىرعان جٶن.

"فەرمەرلەر كرەديتتٸڭ العاشقى تٶلەمٸن جابۋ ٷشٸن ەگٸنٸن جيناپ بولا سالا, ٶنٸمٸن ارزان باعاعا ساتىپ جٸبەرۋگە مەجبٷر. بۇعان جول بەرۋگە بولمايدى", – دەدٸ پرەزيدەنت.

قاسىم-جومارت توقاەۆ ٷكٸمەت پەن اۋىل شارۋاشىلىعى مينيسترلٸگٸنە شارۋالاردى نەسيەلەۋ شارتتارىن جەتٸلدٸرٸپ, اتالعان مەسەلەنٸ شەشۋدٸ تاپسىردى.