مەملەكەت باسشىسى قاسىم-جومارت توقايەۆ سامارقاندتا وتكەن "ورتالىق ازيا – ەۋروپا وداعى" سامميتىندە سيرەك كەزدەسەتىن مەتالداردى زەرتتەيتىن ايماقتىق ورتالىق قۇرۋدى ۇسىندى، دەپ حابارلايدى Dalanews.kz اقوردانىڭ باسپا ءسوز قىزمەتىنە سىلتەمە جاساپ.
قاسىم-جومارت توقايەۆتىڭ پىكىرىنشە، سيرەك كەزدەسەتىن مينەرالداردى يگەرۋ سالاسىنداعى ىنتىماقتاستىقتىڭ ستراتەگيالىق ماڭىزى زور.
بۇگىندە قازاقستاندا ەۋروپا وداعى ەكونوميكاسىنا قاجەتتى 34 شيكىزاتتىڭ 19 ءتۇرى وندىرىلەدى. ونىڭ قاتارىندا ۋران، تيتان، مىس، ليتيي، كوبالت، ۆولفرام جانە باسقا دا كوپتەگەن ەلەمەنتتەر بار. سونىمەن قاتار ەلىمىز ەۋروپالىق قايتا قۇرۋ جانە دامۋ بانكىمەن اراداعى كەلىسىم بويىنشا گەولوگيالىق بارلاۋ سالاسىندا بىرلەسكەن جوبالاردى ىسكە اسىرىپ، كەن يگەرۋدىڭ وزىق تاجىريبەسىن ەنگىزىپ جاتىر.
"بۇل رەتتە پرەزيدەنت استانادا سيرەك كەزدەسەتىن مەتالداردى زەرتتەيتىن ايماقتىق ورتالىق قۇرۋدى ۇسىندى. اتالعان عىلىمي مەكەمە كاسىپورىندار مەن ينۆەستورلاردى يگەرۋگە بولاتىن كەنىشتەر، تەحنولوگيالاردىڭ دامۋى تۋرالى وزەكتى اقپاراتپەن قامتاماسىز ەتەدى"، دەلىنگەن اقوردا حابارلاماسىندا.
بۇعان دەيىن سايتىمىزدا "ترامپ قاۋزاپ جاتىر". ساراپشى شۇعىل تۇردە ستراتەگيالىق اكتيۆتەر اگەنتتىگىن قۇرۋدى ۇسىندى" دەگەن ماقالا جاريالانعان بولاتىن.
