بۇگىن مەملەكەت باسشىسى قاسىم-جومارت توقايەۆ استانادا دۇنيەجۇزىلىك تاەكۆوندو فەدەراسياسىنىڭ (WT) پرەزيدەنتى چۋنگۆون چوۋدى قابىلدادى دەپ جازادى Dalanews.kz.
پرەزيدەنت بۇل كەزدەسۋدىڭ قازاقستان سپورت قاۋىمداستىعى ءۇشىن ەلەۋلى وقيعا ەكەنىن اتاپ ءوتتى. فەدەراسيا باسشىسىنىڭ ارنايى ساپارى ەلىمىزدەگى تاەكۆوندو سپورتىنىڭ دامۋىنا تىڭ سەرپىن بەرەدى.
«تاەكۆوندو جاي عانا وليمپيادالىق سپورت ەمەس، ول بۇكىل الەمدەگى ميلليونداعان ادامدى ءبىر يدەياعا بىرىكتىرگەن، ۇيلەسىمدىلىك پەن ءوزارا سىيلاستىق فيلوسوفياسى. ال 2025 جىلى استانادا وتەتىن G1 ساناتىنداعى Kazakhstan Open حالىقارالىق ءتۋرنيرى ەلىمىزدەگى سپورتشىلاردىڭ دەڭگەيىن ءوسىرىپ، تاجىريبە الماسۋعا كەڭ مۇمكىندىك اشادى»، – دەدى توقايەۆ.
فەدەراسيا باسشىسى چۋنگۆون چوۋ ءوز كەزەگىندە مەملەكەت باسشىسىنا ىستىق ىقىلاسى مەن جىلى قابىلداۋى ءۇشىن العىس ايتىپ، قازاقستانداعى تاەكۆوندونىڭ دامۋ قارقىنىنا جوعارى باعا بەردى.
ول ەلىمىزدە ۇيىمداستىرىلاتىن حالىقارالىق جارىستاردىڭ دەڭگەيىن ەرەكشە اتاپ ءوتتى.
كەزدەسۋ بارىسىندا قاسىم-جومارت توقايەۆ دۇنيەجۇزىلىك تاەكۆوندو فەدەراسياسىنىڭ پرەزيدەنتىن الەمدەگى تاەكۆوندو سپورتىنىڭ دامۋىنا قوسقان زور ۇلەسى ءۇشىن «دوستىق» وردەنىنىڭ ءىى دارەجەسىمەن ماراپاتتادى.
ءوز كەزەگىندە چۋنگۆون چوۋ قازاقستان پرەزيدەنتىنە قۇرمەت كورسەتىپ، توعىزىنشى دان دارەجەسىندەگى قارا بەلبەۋ تابىستادى.
كەزدەسۋ سوڭىندا قىزىق جاعداي بولدى. فەدەراسيا باسشىسى تاەكۆوندونىڭ ءداستۇرى بويىنشا توقايەۆتان اعاش تاقتايدى سىندىرۋدى ءوتىندى. پرەزيدەنت اۋەلدە «Really؟» («شىن ايتاسىز با؟») دەپ تاڭعالدى.
سودان كەيىن چۋنگۆون چوۋدىڭ ازىلدەپ تۇرماعانىنا كوز جەتكىزىپ، ۇسىنىستى قابىل الدى. مەملەكەت باسشىسى سوققى جاساپ، اعاش تاقتايدى ءبىر-اق ۇردى.
وسىلايشا، توعىزىنشى دان يەسى اتانعان توقايەۆ تاقتاي سىندىرىپ، ءداستۇردى جالعاستىردى.
