شاعىن كيكىلجىڭنەن قانداي جاعدايدىڭ ورىن الاتىنىن كەشەگى قورداي وقيعاسى كورسەتىپ وتىر. ەرەگىستىڭ سوڭى ۇلكەن جانجالعا ۇلاستى. ادام شىعىنى بولدى. ولاردىڭ يمانى سالامات بولسىن. ءبىز وسىنداي ساتتەردە اشۋدى اقىلعا جەڭدىرىپ، سابىرلىق تانىتقانىمىز ءجون.
ەل پرەزيدەنتى قاسىم-جومارت توقايەۆ قوردايدا ورىن العان وقيعاعا بايلانىستى مالىمدەمە جاساپ، قازا بولعان ازاماتتاردىڭ وتباسىلارىنا كوڭىل ايتتى. ولارعا ءتيىستى كومەك كورسەتۋدى تاپسىردى. ەلدە زاڭ ۇستەمدىگىنىڭ ساقتالاتىنىن قاداپ ايتىپ، پرەمەر-مينيستردىڭ ورىنباسارى ءتوراعالىق ەتەتىن ۇكىمەت كوميسسياسىن قۇردى.
قازاقستاننىڭ تىنىشتىعى، ەڭ الدىمەن، ەل يەسى حالقىمىزعا كەرەك. زاڭعا باعىنۋ - بارلىق قازاقستاندىقتاردىڭ مىندەتى. قۇزىرلى ورگاندارعا كۇش كورسەتۋگە ەشكىمگە جول بەرىلمەيدى.
ۇلتارالىق قارىم-قاتىناس – وتە نازىك دۇنيە. اپ-ساتتە ءبۇلدىرىپ الۋ وڭاي. ەگەر ەلدە تاتۋلىق بولماسا، ەڭ الدىمەن زارداپ شەگەتىن حالىق. زاڭعا جۇگىنگەن، تاتۋلىق پەن ەلدىكتى مۇرات ەتكەن ەلباسى ساياساتىن ۇستانعان ەلمىز. بارلىق ماسەلە زاڭ اياسىندا شەشىلۋى ءتيىس.
بارشامىز، ەڭ الدىمەن، پارتيالاستار، وسىعان ۇمتىلۋىمىز كەرەك.
