ءىس-شارانى اشقان ۋنيۆەرسيتەتتىڭ الەۋمەتتىك دامۋ جونىندەگى پرورەكتورى شىڭعىس نۇرلان ۇلى نۇرلانوۆ تىلدەر مەرەكەسىنىڭ ماڭىزدىلىعىنا توقتالدى. سونداي-اق ول ءوز سوزىندە ەلىمىزدە ءومىر ءسۇرىپ جاتقان ءار ۇلتتىڭ وكىلدەرى ءوز مادەنيەتى مەن ادەبيەتىن دامىتۋىنا تولىق جاعداي جاسالعانىن، ال انا ءتىلىمىز ەلدىك پەن تاۋەلسىزدىكتىڭ، تاتۋلىق پەن بىرلىكتىڭ ايعاعى ەكەنىن ءسوز ەتتى. ال تاربيە، الەۋمەتتىك جۇمىستار جانە جاستار ساياساتى جونىندەگى دەپارتامەنت ديرەكتورى بەكپەنبەتوۆا قازىنا اسان قىزى ستۋدەنتتەردى تىلدەر مەرەكەسىمەن قۇتتىقتاپ، ۇيىمداستىرۋشىلار جۇمىسىنا تابىس تىلەدى.
“ءتىل- ۇلتتىڭ ايناسى” دەگەن ۇستانىمدى ۇستانعان ستۋدەنت-جاستارىمىز تۋعان تىلىمىزگە دەگەن قۇرمەتى مەن سۇيىسپەنشىلىگىن قازاقتىڭ قارا دومبىراسىندا كۇمبىرلەگەن كۇي تارتىپ، ءان شىرقاپ جانە اقىن-جازۋشىلارىمىزدىڭ وتتى جىرلارىن وقي وتىرىپ جەتكىزدى. سونىمەن قاتار ۇلت ۇستازى احمەت بايتۇرسىنوۆتىڭ قازاق ءتىلىنىڭ دامۋىنا قوسقان ۇلەسى مەن شىعارماشىلىعى تۋراسىندا بايانداما جاسالىپ، “بىرلىك” اسسامبلەياسى ۇيىمىنىڭ ستۋدەنتتەرى وزدەرىنىڭ جۇرەك جاردى قۇتتىقتاۋلارىن ۇيعىر، تاجىك، ورىس تىلدەرىندە جەتكىزدى. ءىس-شارا بارىسىندا ءسوز العان اكادەميك س.قيرابايەۆ اتىنداعى قازاق ءتىلى مەن ادەبيەتى كافەدراسىنىڭ مەڭگەرۋشىسى، فيلولوگيا عىلىمدارىنىڭ دوكتورى، پروفەسسور يلياسوۆا ناعيما ابزەلبەك قىزى الداعى ۋاقىتتا كافەدرا تاراپىنان وسىنداي يگى باستامالار كوپتەپ ۇيىمداستىرىلاتىنىن ايتا كەلە ونەرلى ستۋدەنتتەرگە شىعارماشىلىق تابىستار تىلەدى.
كەش سوڭىندا «رۋحاني جاڭعىرۋ» ورتالىعىنىڭ باسشىسى جاقاۋوۆ ماقسات دوڭەس ۇلى بۇگىنگى باسقوسۋ جاستارىمىزدىڭ دوستىعى مەن تاتۋلىعىن ارتتىراتىنى ءسوزسىز ەكەنىن بايانداي كەلە، مازمۇنى تەرەڭ شارانى ۇيىمداستىرعان اسسامبلەيا كافەدراسىنىڭ مەڭگەرۋشىسى شاھارمان گۇلجيھان پىشەنباي قىزى مەن اكادەميك س.قيرابايەۆ اتىنداعى قازاق ءتىلى مەن ادەبيەتى كافەدراسىنىڭ مەڭگەرۋشىسى يلياسوۆا ناعيما ابزەلبەكقىزىنا جانە ونەرلى ستۋدەنت قاۋىمعا العىس ءبىلدىردى.
شوقان قۇتتىبايەۆ، اباي اتىنداعى قازۇپۋ، اكادەميك س.قيرابايەۆ اتىنداعى قازاق ءتىلى مەن ادەبيەتى كافەدراسىنىڭ اعا وقىتۋشىسى
