كومپانيانىڭ اۆياسيا دەپارتامەنتى جەتەكشىسى قۋانىش مۇسايەۆتىڭ سوزىنشە، جەكەمەنشىك مەكەمە كوممەرسيالىق قىزمەت كورسەتۋگە جۋىردا عانا رۇقسات العان. ال جاس جۇبايلاردىڭ تاپسىرىسى العاشقىسى ەكەن.
– سوڭعى كەزدەرى قارجىلىق قيىندىقتار بولۋىنا بايلانىستى ءبىز كوممەرسيالىق قىزمەت كورسەتۋ ءۇشىن رۇقسات العان بولاتىنبىز. ارنايى سايت اشىپ، جارناما دا بەرىپ قويدىق. ال، جاس جۇبايلاردىڭ تاپسىرىسى العاشقىسى ەدى. ءبىراق مۇنشالىقتى شۋ شىعادى دەپ ويلامادىق. ياعني، تويعا كەلگەن قوناقتار تىكۇشاقتى ءتۇسىرىپ، الەۋمەتتىك جەلىلەرگە تاراتىپ جىبەرىپتى. ەندى بىزگە سونى كەسىرى ءتيىپ كەتۋى مۇمكىن، – دەيدى قۋانىش مۇسايەۆ.
ەستەرىڭىزگە سالا كەتەيىك، كۇنى كەشە وڭتۇستىك وڭىرىندە توي كورتەدجىمەن بىرگە ۇشقان تىكۇشاقتىڭ بەينەجازباسى بارلىق الەۋمەتتىك جەلىلەرگە تاراپ كەتكەن بولاتىن. تۇسىرىلىمدە توي كورتەدجىمەن ىلەسىپ بارا جاتقان تىكۇشاق تومەن قاراي ءتۇسىپ، قايتا كوتەرىلگەن.
بۇگىن ءوڭىردىڭ جەرگىلىكتى پوليسەيلەرى وسى جايت بويىنشا انىقتاۋ جۇمىستارىنا كىرىسكەن ەدى. كەيىننەن ۇيلەنىپ جاتقان ازامات ايتۋعان ەسىمدى سۋرەتشى ەكەنى بەلگىلى بولدى.
«جىگىتتەر» توبىنىڭ مۇشەسى باعلان ءابدىرايىموۆ ينستاگرامداعى پاراقشاسىندا ۇيلەنگەن جىگىتكە بىلايشا ارا ءتۇستى.
«كەزىندە مەن ۇيلەنگەندە سۋرەتكە ءتۇسىرىپ قىزمەت جاساپ ەدى. بۇگىن مىنە مەنىڭ دە قىزمەتىم ءوتتى. بۇگىنگى ينتەرنەتتىڭ «گ ۇلى» بولعان وسى جاستار. ول – باي ەمەس، ول – بايدىڭ بالاسى ەمەس، ول – قاراپايىم سۋرەتكە تۇسىرەتىن، يدەياسى مىقتى جىگىت! ۆەرتولوتپەن «گۋليانكا» جاساپ جۇرگەن وسى عوي! اللا باقتارىڭدى اشسىن، ايتۋعان!»، – دەپ جازدى باعلان ءابدىرايىموۆ.
ەگەر قاراپايىم سۋرەتكە تۇسىرەتىن جىگىت تىكۇشاق جالداپ، توي كورتەدجىن ۇيىمداستىرسا، باسقا ەل نە ىستەمەيدى؟ سوندىقتان بۇل جەردە ءانشىنىڭ توي يەسى «باي ەمەس، بايدىڭ بالاسى دا ەمەس» دەپ شىر-پىر بولىپ ارا ءتۇسۋىنىڭ ءجونى جوق. اقشاسى بار، يدەياسى جوق بايلار مۇنى كورىپ، ەرتەڭ «گۋليانكالارىنا» تىكۇشاق جالداۋدى ادەتكە اينالدىرۋى مۇمكىن. سوندىقتان بۇعان بيلىك تاراپىنان تىيىم سالىنۋى قاجەت. ەگەر ۇشاق جەرگە جاقىن ۇشىپ، جول بويىنداعى سىمعا قالاعىنىڭ ۇشى ءتيىپ كەتسە، تالاي ادام مەرت بولماي ما؟
سوندىقتان تويعا تىكۇشاق جالداۋدىڭ باس-اياعى وسىمەن توقتاۋ كەرەك. ويىننان ءورت شىعىپ كەتۋى مۇمكىن.
سونىمەن قاتار مۇناي كوماپنياسىنىڭ ۇشقىشتارىنىڭ تويعا قىزىمەت كورسەتۋىنە قاتاڭ تۇردە تىيىم سالۋى كەرەك. ەگەر بۇعان تىيىم سالماساق، تويعا قىزمەت كورسەتىپ كۇرەپ اقشا تاۋىپ جۇرگەن يدەياسى «مىقتى» جىگىتتەر ءبىر اسكەري بولىمشەمەن كەلىسىپ، ونشاقتى تانكتى جالداپ، توي شەرۋىن ۇيىمداستىرىپ، ءوزى ارەڭ تۇرعان جولدارىمىزدى تالقانداۋى مۇمكىن.
https://dalanews.kz/29149
