رەسەي پرەزيدەنتىنىڭ قازاقستانداعى مەملەكەتتىك ساپارى كەزىندە "استانا وپەرا" تەاترىنداعى LED-ەكراندا ۋكراينانىڭ تۋى كورسەتىلگەن. ىشكى ىستەر مينيسترلىگى بۇل دەرەككە قاتىستى تەرگەۋدى باستادى، دەپ حابارلايدى Dalanews.kz. 

27 قاراشادا "استانا وپەرا" تەاترىنىڭ ەكرانىندا باستاپقىدا رەسەي تۋى كورسەتىلىپ تۇرعان. ارتىنشا ەكراندا ۋكراينا تۋى كورسەتىلە باستاعان. 

"چەمودان گوسسەكرەتوۆ" تەلەگرام ارناسىنداعى مالىمەت بويىنشا،ۋكراينا تۋى كورسەتىلگەن LED-ەكرانعا شەتەلدىك IP-مەكەنجايدان پروكسي-جۇيەلەردى قولدانۋ ارقىلى شابۋىل جاسالعان. 

"مەملەكەتتىك تەحنيكالىق قىزمەت ءىستىڭ ءمان-جايىن انىقتاۋ بويىنشا تەحنيكالىق شارالار كەشەنىن جۇرگىزۋدە. قىلمىستىق ءىس قوزعالدى"، دەلىنگەن جازبادا. 

قازاقستاننىڭ ىشكى ىستەر مينيسترلىگى ەكى نۇسقانى قاراستىرىپ وتىر: ءبىرىنشىسى - تەحنيكالىق اقاۋ، ەكىنشىسى - حاكەرلىك شابۋىل.

«وقيعانىڭ بارلىق ءمان-جايى انىقتالىپ، زاڭسىز ارەكەتتەرگە كىنالىلەر جاۋاپقا تارتىلادى»، - دەپ حابارلادى ىشكى ىستەر مينيسترلىگى.

ەسكە سالايىق، 27 قاراشادا رەسەي فەدەراسياسىنىڭ پرەزيدەنتى ۆلاديمير پۋتين استاناعا مەملەكەتتىك ساپارمەن كەلدى. قاسىم-جومارت توقايەۆ ءپۋتيندى ەلوردا اۋەجايىنان قارسى الدى. 

مارتەبەلى قوناقتى كۇتىپ الۋ ءۇشىن اۋەجايدا قۇرمەت قاراۋىلى ساپ تۇزەدى.

قازاقستان مەن رەسەي حالىقتارىنىڭ شىنايى دوستىعىنىڭ بەلگىسى رەتىندە بالالار ەكى ەلدىڭ جالاۋىن جەلبىرەتىپ، قوشەمەت كورسەتتى جانە ۆلاديمير پۋتين باستاعان رەسەي دەلەگاسياسىنا ءىلتيپات ءبىلدىرىپ، ولەڭ وقىدى.

بۇدان كەيىن كاسىبي سۋرەتشى اسەل سابىرجان قىزى (اسسول) ۆلاديمير پۋتين استاناعا ۇشقان ساتتە سالا باستاعان كارتيناسىن تانىستىردى. ول سونداي-اق مەملەكەتتەر باسشىلارىنا پولوتنونى جازۋعا ۇلەس قوسۋدى ۇسىندى.

كارتينا رەسەي پرەزيدەنتىنە ساپار سوڭىندا سىيعا تارتىلادى.