– 2020 جىلدىڭ مامىرىنان باستاپ عيماراتتى ىزدەستىرۋ جانە ونى جوندەۋ جۇمىستارى باستالدى، نىساندى جوندەۋگە ءبىر اپتا ۋاقىت كەتتى. بۇل كاسىپورىن ورنالاسقان جەردى كەيىننەن ساتىپ الۋ مۇمكىندىگى ارقىلى جالعا الىپ وتىرمىز، – دەيدى تەكەلىدەگى «تەحنو اۆيا گرۋپپ» سەرىكتەستىگىنىڭ فيليال باسشىسى جارىلقاسىن بولات ۇلى.
باسشىلىقتىڭ ايتۋىنشا، سەحتىڭ الىپ جاتقان اۋماعى 350 شارشى مەتردى قۇرايدى. بۇگىندە ءوندىرىس ورنى 50 جوعارى جىلدامدىقتى، 10 ارنايى وندىرىستىك تىگىن ماشينالارىمەن قامتاماسىز ەتىلگەن. جاڭا تىگىن سەحى اشىلعانىن ەستىگەن تەكەلى حالقىنىڭ قۋانىشىندا شەك جوق. سەبەبى، الداعى ۋاقىتتا 70 جۇمىس ورنى اشىلماق.
قادامىن ەندى باسقان كاسىپورىننىڭ عۇمىرى ۇزاق بولارى ءسوزسىز. العاشقى كەزەڭنەن باستاپ كۇندىگىنە 18-20 مىڭ دانا، ايىنا 400 مىڭ دانا بەتپەردە تىگۋ جوسپارلانعان. بۇل جوسپاردى ىسكە اسىرۋ ءۇشىن 19،0 ملن تەڭگە ينۆەستيسيا تارتۋ جوسپارلانعان.
ءىستىڭ العا باسۋىنا مىندەتتى تۇردە جۇيە كەرەك. وسى تۇرعىسىندا ءوندىرىس ورنى ەشكىمنەن قالىسپايدى. بارلىق ارەكەتى مەن باعدارى الدىن-الا دايىندالعان. ياعني، قولعا العان ىستەرىندە رەتتىلىك بار.
سەح باسشىلىعىنىڭ جوسپارىنا سايكەس جۇمىس كەستەسى تولىق ازىرلەنگەن.
ماسەلەن، مامىر-شىلدە ايىنىڭ سوڭىنا دەيىن ءبىر رەتتىك پايدالانىلاتىن مەديسينالىق بەتپەردەلەر، حالاتتار، كومبينەزوندار تىگۋدى جوسپارلاپ وتىر.
تامىز ايىنان باستاپ جەكە كومپانيالارعا، ياعني، مۇناي، ەنەرگەتيكا سالاسىنداعى ءوندىرىس ورنىدارى ءۇشىن ارنايى كيىم ازىرلەي باستايدى.
الداعى ۋاقىتتا كاسىپتىڭ تاسىن ورگە دومالاتۋ ماقساتىندا ق ر قورعانىس مينيسترلىگىنىڭ مەملەكەتتىك ساتىپ الۋلارىنا قاتىسۋ كوزدەلىنگەن.
جاۋاپتى تۇلعالار كاسىپورىن جۇمىسىنىڭ الەۋمەتتىك سيپاتىنا ۇلكەن ءمان بەرۋدە. سوندىقتان سەح قىزمەتكەرلەرى ءۇشىن تەكەلى قالاسى بويىنشا تاسىمالداۋ جانە تەگىن تۇسكى اس قاراستىرىلعان.
انار سابىروۆا، الماتى وبلىسى.
