– 2020 jyldyń mamyrynan bastap ǵimaratty izdestirý jáne ony jóndeý jumystary bastaldy, nysandy jóndeýge bir apta ýaqyt ketti. Bul kásiporyn ornalasqan jerdi keiinnen satyp alý múmkindigi arqyly jalǵa alyp otyrmyz, – deidi Tekelidegi «Tehno Avia Grýpp» seriktestiginiń filial basshysy Jarylqasyn Bolatuly.
Basshylyqtyń aitýynsha, tsehtiń alyp jatqan aýmaǵy 350 sharshy metrdi quraidy. Búginde óndiris orny 50 joǵary jyldamdyqty, 10 arnaiy óndiristik tigin mashinalarymen qamtamasyz etilgen. Jańa tigin tsehy ashylǵanyn estigen Tekeli halqynyń qýanyshynda shek joq. Sebebi, aldaǵy ýaqytta 70 jumys orny ashylmaq.
Qadamyn endi basqan kásiporynnyń ǵumyry uzaq bolary sózsiz. Alǵashqy kezeńnen bastap kúndigine 18-20 myń dana, aiyna 400 myń dana betperde tigý josparlanǵan. Bul jospardy iske asyrý úshin 19,0 mln teńge investitsiia tartý josparlanǵan.
Istiń alǵa basýyna mindetti túrde júie kerek. Osy turǵysynda óndiris orny eshkimnen qalyspaidy. Barlyq áreketi men baǵdary aldyn-ala daiyndalǵan. Iaǵni, qolǵa alǵan isterinde rettilik bar.
Tseh basshylyǵynyń josparyna sáikes jumys kestesi tolyq ázirlengen.
Máselen, mamyr-shilde aiynyń sońyna deiin bir rettik paidalanylatyn meditsinalyq betperdeler, halattar, kombinezondar tigýdi josparlap otyr.
Aldaǵy ýaqytta kásiptiń tasyn órge domalatý maqsatynda QR Qorǵanys ministrliginiń Memlekettik satyp alýlaryna qatysý kózdelingen.
Jaýapty tulǵalar kásiporyn jumysynyń áleýmettik sipatyna úlken mán berýde. Sondyqtan tseh qyzmetkerleri úshin Tekeli qalasy boiynsha tasymaldaý jáne tegin túski as qarastyrylǵan.
Anar SABYROVA, Almaty oblysy.
