قونايەۆ قالاسىندا "تازارۋ كۇنىنە" وراي ەكولوگيالىق اكسيا ءوتتى،- دەپ حابارلايدى Dalanews.kz
ناۋرىز – تابيعاتتىڭ جاڭارۋ، جاڭعىرۋ كەزەڭى، ادامداردىڭ بىرلىگى مەن ىنتىماعىنىڭ مەرەكەسى. بۇل ەجەلدەن كەلە جاتقان مەيرام مەملەكەت باسشىسى قاسىم-جومارت كەمەل ۇلى توقايەۆتىڭ باستاماسىمەن بىلتىردان باستاپ جاڭا فورماتتا تويلانۋدا. ون كۇنگە سوزىلاتىن «ناۋرىزناما» تۇجىرىمداماسى بۇل مەيرامعا تەرەڭ ماعىنا بەرىپ، ونىڭ ۇلتتىق ءمانىن ارتتىرا ءتۇستى.
بۇگىن، 23 ناۋرىز – تازارۋ كۇنى، قورشاعان ورتانىڭ تازالىعىنا جانە ادامنىڭ ىشكى جان دۇنيەسىنىڭ ۇيلەسىمدىلىگىنە ارنالادى. بۇل كۇنى ەلىمىزدىڭ تۇكپىر-تۇكپىرىندە سەنبىلىكتەر، ەكولوگيالىق اكسيالار مەن تابيعاتتى قورعاۋ شارالارى وتۋدە.
بۇل يگى باستامادان وبلىس ورتالىعى – قونايەۆ قالاسىنىڭ تۇرعىندارى دا شەت قالمادى. بەلسەندىلەردىڭ، قوعامدىق ۇيىمداردىڭ جانە مەكەمە قىزمەتكەرلەرىنىڭ باستاماسىمەن كەڭ اۋقىمدى سانيتارلىق تازارتۋ اكسياسى ۇيىمداستىرىلدى. ءىس-شاراعا 100-دەن استام ادام قاتىسىپ، 10 تونناعا جۋىق قوقىس جينالدى. اكسيا بارىسىندا «جاسىل قالا قونايەۆ» ۇيىمى باسشىسىنىڭ ورىنباسارى اسحات سارسەمبەك ۇلى مۇنداي باستامالاردىڭ تەك تازالىقتى ساقتاۋعا عانا ەمەس، قوعامدا قورشاعان ورتاعا دەگەن جاۋاپكەرشىلىكتى قالىپتاستىرۋعا دا سەپتىگىن تيگىزەتىنىن اتاپ ءوتتى.
وبلىس كولەمىندە وتكەن اكسيانىڭ ناتيجەلەرى:
- 7635 ادام سەنبىلىككە قاتىستى؛
- 152،5 توننا قوقىس شىعارىلدى؛
- 21 ارنايى تەحنيكا جۇمىلدىرىلدى؛
- 1040 اعاش وتىرعىزىلدى.
بۇل كورسەتكىشتەر تۇرعىندار مەن قوعامدىق ۇيىمداردىڭ بىرلەسكەن كۇش-جىگەرى اينالامىزدى تازا ءارى كورىكتى ەتە الاتىنىن ايقىن دالەلدەيدى. تازارۋ كۇنى تابيعاتقا دەگەن جاناشىرلىقتىڭ ماڭىزدىلىعىن ەسكە سالادى. ويتكەنى اۋلامىزدىڭ، كوشەلەرىمىزدىڭ، ساياباقتارىمىزدىڭ تازالىعى – تەك جايلىلىقتىڭ عانا ەمەس، قوعام مادەنيەتىنىڭ دە كورسەتكىشى.
ناۋرىز ءار شاڭىراققا تاتۋلىق، جاقسىلىق پەن اماندىق اكەلسىن!
