كۇرشىم اۋىلىندا «JASYL EL» جاستار ەڭبەك جاساقتارىنىڭ XXI ماۋسىمى اشىلدى، – دەپ حابارلايدى Dalanews.kz
ءىس-شاراعا رەسپۋبليكالىق شتاب جەتەكشىسى نۇراسىل بەكماتوۆ قاتىسىپ، جاستاردى قۇتتىقتادى. ول «JASYL EL» جوباسىنىڭ بيىل 20 جىلدىعى ەكەنىن اتاپ ءوتىپ، جىل سوڭىندا ۇزدىك جاساقتار ماراپاتتالاتىنىن ايتتى.
2005 جىلدان بەرى جۇمىس ىستەپ كەلە جاتقان بۇل جاساقتار ەكولوگيانى ساقتاۋ، كوگالداندىرۋ، جاستاردى ەڭبەككە باۋلۋ باعىتىندا جۇمىس ىستەيدى. بىلتىر شقو-دا 1021 جاس قامتىلسا، بيىل 1000 ادامدى تارتۋ جوسپارلانعان.
جاستار رەسۋرستىق ورتالىعىنىڭ ۇيىمداستىرۋىمەن وتكەن شاراعا مەملەكەتتىك ورگاندار مەن ۆولونتەرلەر قاتىستى. جاستار اعاش ەگىپ، تازالىق جۇمىستارىن جۇرگىزدى. جيىندا ماۋسىمدىق جۇمىسپەن قامتۋ، ەكولوگيالىق مادەنيەت، جۇمىس بەرۋشىلەرمەن ارىپتەستىك ماسەلەلەرى تالقىلاندى.
– بيىل وبلىستاعى جاستار جاساقتارى 11 اۋدان مەن 2 قالادا جۇمىس ىستەيدى. باعدارلاماعا 13 جۇمىس بەرۋشى قاتىسادى. 2024–2029 جىلدارعا ارنالعان «تازا قازاقستان» ەكولوگيالىق مادەنيەتتى دامىتۋ تۇجىرىمداماسى اياسىندا ۇيىمداستىرىلاتىن الەۋمەتتىك جانە ەكولوگيالىق جوبالارعا قاتىسىپ، اعاش كوشەتتەرىن وتىرعىزىپ، اۋىل، قالا، اۋدان اۋماقتارىن، ءتۇرلى نىساندار ماڭىن تۇرمىستىق قالدىقتاردان، قوقىستاردان، شوپتەردەن تازالاماق، – دەيدى «JASYL EL» جاساعى وبلىستىق فيليالىنىڭ ديرەكتورى ماقسات كارىمبايەۆ.
وقۋشىلار، ستۋدەنتتەر مەن جۇمىسسىز جاستار ءۇشىن بۇل جوبا – تاجىريبە الاڭى. جوباعا قاتىسۋشى جاستار – حالىقتىڭ الەۋمەتتىك وسال توپتارى، جۇمىس جاساي الاتىن مۇمكىندىگى شەكتەۋلى ادامدار، NEET ساناتىنداعى جاستار.
