پرەزيدەنت قاسىم-جومارت توقايەۆتىڭ كەڭەسشىسى جانە باسپا ءسوز حاتشىسى رۋسلان جەلدىباي «تازا قازاقستان» جالپىرەسپۋبليكالىق اكسياسىنىڭ ناتيجەسى تۋرالى ايتتى، دەپ حابارلايدى Dalanews.kz.

بۇل تۋرادى ول تەلەگرام ارناسىندا جازدى. 

"تازا قازاقستان" اكسياسى بىلتىر ءساۋىر ايىنان بەرى مەملەكەت باسشىسىنىڭ باستاماسىمەن ۇيىمداستىرىلىپ كەلەدى.

"ەكولوگيالىق ءارى الەۋمەتتىك ماڭىزى جوعارى بۇل جوبانى جۇرتشىلىقتىڭ ءبارى، اسىرەسە، جاستاردىڭ كەڭىنەن قولداعانى قۋانتادى. بۇگىندە «تازا قازاقستان» اكسياسى حالقىمىز تۇگەلدەي قاتىساتىن اۋقىمدى شاراعا اينالدى دەپ سەنىمدى تۇردە ايتۋعا بولادى.

اكسياعا بارلىق ءوڭىر اتسالىستى. جالپى، ەل اۋماعىندا 183 ەكولوگيالىق اكسيا ءوتتى. وعان 6،2 ميلليوننان استام ادام قاتىستى، ولاردىڭ ىشىندە 229 مىڭ ەرىكتى بار"، دەيدى جەلدىباي.

ناتيجەسىندە 1،1 ميلليون توننادان اسا قوقىس جينالىپ، 1،6 ميلليونعا جۋىق اعاش كوشەتى ەگىلگەن. 

"جوبا اياسىندا اۋقىمدى جۇمىس اتقارىلدى: اۋلالار مەن اۋماقتار تازالاندى («تازا ولكە»، World Clean Up Day، «ونەگەلى ۇرپاق»)، اعاش كوشەتتەرى ەگىلدى («جاسىل ايماق»، بۇكىلقازاقستاندىق ورمان ەگۋ كۇنى)؛ مادەني-تاريحي ەسكەرتكىشتەر اۋماعى تازارتىلدى («كيەلى مەكەن»)؛ وزەن-كولدەر مەن سۋ توعاندارىنىڭ جاعالاۋلارى رەتكە كەلتىرىلدى («ءمولدىر بۇلاق»، «تازا جاعالاۋ»).

رۇقسات ەتىلمەگەن قوقىس الاڭدارى ايتارلىقتاي ازايدى. ەگەر 2018 جىلى 8،7 مىڭ قوقىس ورنى انىقتالىپ، ونىڭ 57 پايىزى جويىلسا، 2024 جىلى 4،8 مىڭعا جۋىق قوقىس الاڭى بەلگىلى بولىپ، 93 پايىزى جويىلدى"، دەلىنگەن جازبادا.

بىلتىر ماۋسىم ايىندا @TazaQazBot چات-بوتى ىسكە قوسىلدى. جۇرتشىلىق بۇل پلاتفورماعا وزدەرى كۋا بولعان كەلەڭسىز فاكتىلەردى حابارلاي الادى.

"چات-بوت ىسكە قوسىلعان ساتتەن باستاپ 15806 ءوتىنىم ءتۇسىپ، ونىڭ 14417ء-سى ورىندالدى. قالعان 302ء-سى بويىنشا ءتيىستى جۇمىستار قولعا الىنعان. بيىل «تازا قازاقستان» اياسىنداعى ەكولوگيالىق ءىس-شارالار ناۋرىز ايىنان باستاپ وڭتۇستىك جانە باتىس وڭىرلەردە قولعا الىندى. بۇگىنگە دەيىن ۇيىمداستىرىلعان 11 تازالىق ءىس-شاراسىنا 223 مىڭنان استام ادام قاتىستى. ونىڭ ىشىندە 11،6 مىڭنان استامى – ەرىكتىلەر"، دەيدى رۋسلان جەلدىباي. 

ناتيجەسىندە 7،6 مىڭ توننا قوقىس جينالىپ، 385 مىڭ گەكتار اۋماق تازارتىلدى. شامامەن 74،1 مىڭ جاسىل جەلەك وتىرعىزىلدى.

"مۇنىڭ ءبارى پرەزيدەنت باستاماسىنىڭ وزەكتى ەكەنىن كورسەتىپ تۇرعانى انىق. مەملەكەت باسشىسى ايتقانداي، «تازا قازاقستان» – ءبىر رەتتىك ناۋقان ەمەس. ول وتانداستارىمىزدىڭ قورشاعان ورتاعا كوزقاراسىن وزگەرتەتىن، وسكەلەڭ ۇرپاقتى تۋعان جەرگە قۇرمەتپەن قاراۋعا تاربيەلەيتىن يگى داستۇرگە اينالۋعا ءتيىس"، دەپ تۇيىندەدى پرەزيدەنتتىڭ كەڭەسشىسى ءارى باسپا ءسوز حاتشىسى.