جاس بۋىننىڭ الەۋەتىن ارتتىرىپ، قاناتىن قاتايتۋ ءۇشىن الماتى وبلىسىندا 15 ۇزدىك جوبا قولداۋ تاپقانىن دا ايتا كەتۋىمىز كەرەك.
ءبىلىمى مەن بىلىگى ۇشتاسقان جالىندى قىز-جىگىتتەردى جارقىن جەڭىسىمەن ايماق باسشىسى مارات سۇلتانعازييەۆ قۇتتىقتادى.
– بۇگىنگى جاستاردىڭ بىلىمگە، يننوۆاسيانى ۇيرەنۋگە، شەت تىلدەرىن مەڭگەرۋگە دەگەن تالپىنىستارى، ەڭبەكقورلىعى ءبىزدى قۋانتادى. جەڭىمپاز اتانعان جوبالار وڭىرىمىزدەگى وزەكتى ماسەلەلەردى شەشۋگە، مەملەكەتتىك جاستار ساياساتىن جەمىستى جۇزەگە اسىرۋعا سەرپىن بەرەتىن جاسامپاز ىستەردىڭ باستاۋى بولسىن. بۇل باعىتتاعى جۇمىس الداعى ۋاقىتتا دا جالعاسىن تابادى. جالپى، مەملەكەتتىك جاستار ساياساتىن جۇزەگە اسىرۋ ءبىزدىڭ باستى مىندەتتەرىمىزدىڭ ءبىرى، – دەدى الماتى وبلىسى اكىمى مارات ەلەۋسىز ۇلى.
قوعامنىڭ ءار سالاسىندا بيزنەس-يدەيالارى مەن وزىندىك جوسپارلارىن جۇزەگە اسىرۋدى كوزدەگەن جاستار قاراسى قالىڭ بولعانىمەن، العاش رەت وتكىزىلگەن اتالمىش گرانت جوباسىنا بارلىعى 35 ۇمىتكەر قاتىسقان. سولاردىڭ ىشىندە تەك 15ء-ى جەڭىمپاز اتانىپ، 1 ملن تەڭگەنىڭ سەرتيفيكاتىنا يە بولدى.
جەڭىمپازداردىڭ قاتارىندا «مەديا» باعىتىندا جەڭىمپاز اتانعان جاس ۆيدەوگراف، ساكەن قۇتتىقباي دا بار. ول ۇيىمداستىرۋشىلارعا العىسىن ءبىلدىرىپ، مۇنداي جوبالار ەل جاستارىنا ۇلكەن ۇمىتپەن بىرگە بولاشاققا دەگەن سەنىم سىيلايتىنىن العا تارتتى.
![](/uploads/images/20240127164926859.jpg)
ءبىرىنشىسى، «ۋاقىت» دەپ اتالادى. اتالعان فيلم جاستاردىڭ ۋاقىتتى ءتيىمدى قولدانۋدى، باعالاۋ كەرەكتىگىن تۇسىندىرەدى.
ەكىنشى تۋىندىعا «ناشاقور» دەگەن ات ارقاۋ بولدى. بۇل جەردە جامان ورتاعا ءتۇسۋ، ىشىمدىككە سالىنۋ كەيىن ناشاقور بولۋعا اكەلۋى مۇمكىن ەكەنى باياندالادى.
ال سوڭعىسى «قۇمار ويىن» دەپ اتالادى. ويتكەنى، قازىرگى تاڭدا قۇمار ويىندارعا سالىنىپ كەتۋ وتە وڭاي. ءتىپتى، ۇيدەن شىقپاي-اق بۇكىل مۇلىكتەن ايىرىلىپ قالۋعا بولادى. بۇل جوبانىڭ ماقساتى جاستار دۇرىس جولدا ءجۇرىپ، ۋاقىتتى جانە جاقىندارىن باعالاۋى ەڭ باستى قۇندىلىق ەكەنىن قالىڭ كوپكە ءتۇسىندىرۋ، – -دەدى ساكەن مۇحتار ۇلى.
اسىعى الشىسىنان تۇسكەندەر قاتارىندا «مادەنيەت» سالاسىندا گرانتتى جەڭىپ شىققان جانىبەك ماقاتاندى اتاپ وتۋگە بولادى.
ول ون ساۋساعىنان ونەر تامعان شەبەر. كونە مۋزىكالىق سىبىزعى مەن سازسىرناي سىندى ۇلتتىق اسپاپتار جاسايدى. ونەردەن تابىس تابۋدىڭ جولىن تاپقان جىگىت قۇرمانعازى اتىنداعى قازاق ۇلتتىق كونسەرۆاتورياسىنىڭ 2 كۋرس بىلىمگەرى.
تۋما تالانتىمەن تالايدى تامساندىرعان جاس، ءوز قولىنان شىققان قوس بىردەي مۋزىكا اسپابىن الماتى وبلىسىنىڭ اكىمى مارات سۇلتانعازييەۆكە ارنايى تابىستادى.
ال، بەرىك ماديار ۇلى، ولجاس مۇباراك، اقبوتا جەتپىسباي، ءازيزا رادجاپوۆا، لاۋرا ءابىلقاسىموۆا، ەرنۇر ءقادىر، دىنمۇحامەد دۇيسەنعالي، بەكبولات بەكسەيىتوۆ، ءمادي بەردىبايەۆتار «بيزنەس» باعىتىندا ارنايى گرانتقا قول جەتكىزدى. «عىلىم» بويىنشا ايگۇل جالعاس، بەكزات سەيىتمۇحانبەتوۆا مەن مەيرامبەك جالعاستار ۇزدىك شىقتى.
ايتا كەتۋ كەرەك، وبلىس حالقىنىڭ 19 پايىزىن جاستار قۇرايدى. ولاردىڭ جالپى سانى – 280 مىڭ. بۇگىنگى كۇنى ولارعا قولداۋ كورسەتۋدىڭ ءتۇرلى باعىتتاعى شارالارى قاراستىرىلعان.
ماسەلەن، 2022 جىلى وبلىس تاريحىندا تۇڭعىش رەت جەرگىلىكتى جاستاردى باسپانامەن قامتاماسىز ەتۋگە قولداۋ كورسەتۋ ءۇشىن «الاتاۋ جاستارى» اتتى ءتۇرعىن-ۇي باعدارلاماسى باستاۋ الدى.
باستاپقى جارناسىز 60 پاتەر الۋ ءۇشىن 600 ملن تەڭگە ءبولىندى. بيىل وسى باعدارلاماعا بولىنەتىن قاراجات كولەمى 3،6 ملرد تەڭگەگە دەيىن كوبەيتىلدى. بۇل قارجى 200 پاتەر الۋعا مۇمكىندىك بەرەدى.
الماتى وبلىسى اكىمى اتاپ وتكەندەي، مۇنىڭ بارلىعى جاستارعا دەگەن ەرەكشە نازاردىڭ ايقىن كورسەتكىشى.