سەمەي يادرولىق سىناق پوليگونى جابىلعاننان كەيىن كۋرچاتوۆ قالاسىندا جۇمىس ىستەگەن اسكەريلەر كەتە باستادى. و باستا قالادا تۇراتىن حالىقتىڭ سانى 55 مىڭ ادامدى قۇراعان ەدى. ال توقىراۋ جىلدارى قالا حالقىنىڭ سانى التى مىڭعا دەيىن قۇلدىرادى. كوپتەگەن تۇرعىن ۇيلەر قاڭىراپ بوس قالعانى جاسىرىن ەمەس.
ءبىراق تاۋەلسىزدىككە يە بولعان قازاقستاننىڭ دامۋ قارقىنى قالاي تەز بولسا، كۋرچاتوۆ قالاسىنىڭ وڭالۋى دا سونداي تەز بولدى. قالا حالقىنىڭ سانى بىرتىندەپ ءوستى. ءقازىر كۋرچاتوۆتا 13 مىڭنان استام حالىق تۇرادى.
تاۋەلسىزدىك جىلدارى كۋرچاتوۆتا قالاعا ءتان ينفراقۇرىلىمدار تولىقتاي ىسكە قوسىلىپ، ەكىنشى تىنىسى اشىلعانى بەلگىلى. قالا ەلىمىزدەگى مونوقالالاردىڭ قاتارىنا قوسىلىپ، وسىپ-وركەندەۋ جولىنا ءتۇستى.
ۇلتتىق يادرولىق ورتالىق پەن سىناق الاڭى قالانىڭ دامۋىنا ايتارلىقتاي سەرپىن بەرگەنى بەلگىلى. بۇدان باسقا شاعىن جانە ورتا بيزنەس قانات جايىپ، جاڭا جۇمىس ورىندارى اشىلۋىنا سەپتەسكەنىن ايتۋعا ءتيىسپىز.
2013 جىلى قالادا «ءۇلبى مەتاللۋرگيا زاۋىتىنىڭ» فيليالى مەن «بالاپان كولىگى» دەپوسى اشىلىپ، قالا تۇرعىندارى تۇراقتى جۇمىسپەن قامتىدى.
وسى رەتتە ءبىلىم بەرۋ سالاسىندا اۋىز تولتىرىپ ايتاتىنداعى جۇمىستار اتقارىلدى. ءبىرىنشى كەزەكتە №1 قالالىق ورتا مەكتەپ كۇردەلى جوندەۋدەن ءوتىپ، قازاق تىلىندە ساباق بەرۋ ءىسى جولعا قويىلدى. ال 2017 جىلى №4 ورتا مەكتەپ كۇردەلى جوندەۋ جۇمىستارى جۇرگىزىلىپ، قالادا «كۇنشۋاق»، «اق بوپە»، «توپولەك» دەپ اتالاتىن بالاباقشالار پايدا بولدى.
«دوستىق ءۇيى» مەن مادەنيەت ءۇيى دە جاڭعىرىپ، قالا تۇرعىندارىنىڭ يگىلىگى ءۇشىن جۇمىس ىستەي باستادى. بۇدان باسقا قاڭىراپ تۇرعان 15 ۇيگە جوندەۋ جۇمىستارى جۇرگىزىلىپ، جۇزدەن استام وتباسى قونىس تويىن تويلاعانىن ايتا كەتۋىمىز كەرەك. «نۇرلى كوش» باعدارلاماسىمەن قالاعا كوشىپ كەلۋشىلەردىڭ قاتارى ارتا ءتۇستى.
