بالا كەزدەن زەرەك بولىپ ءوستى. اينالاسىنا جانى اشىپ، مۇمكىندىگى كەلسە كومەگىن اياعان ەمەس. سودان ارتۋش ەر جەتىپ ەلدىڭ جۇگىن ارتاتىن ماماندىق يەسى اتانۋ ءۇشىن ماسكەۋگە قاراي بەت تۇزەدى. ويلاعان ماسكەۋدەگى بۇكىلوداقتىق تاماق ونەركاسىبى ينستيتۋتىنا وقۋعا ءتۇستى. مۇندا دا ءوز العىرلىعىمەن كوپشىلىكتىڭ كوزىنە ءتۇستى. جان-جاعىنداعىلاردى ۇيىستىرىپ، سونى يدەيالار ايتىپ، جاستاردى توپتاپ ۇلگەردى. قوعامداعى كەز كەلگەن جاعدايعا بەي-جاي قاراماي، كەرىسىنشە ماسەلەنىڭ شەمى تبىلعانشا كوپشىلىتىڭ ورتاسىندا جۇرەتىن. اراعا ءتورت جىل سالىپ، اتالمىش وقۋ ورنىن ءتامامداپ، ينجەنەر-مەحانيك ماماندىعىن الىپ شىقتى.
ەلگە ورالىپ، العاشىندا قۇرىلىس سالاسىندا ب ا ق سىناپ كوردى. جۇمىستىڭ ۇلكەن-كىشىسى بولمايدى دەمەكشى بۇل سالانى دا ۇرشىقشا ءيىرىپ الدى. سىرى كوپ سالانى مەڭگەرىپ، ەندى جەتىستىكتەرىن كورسەتە باستادى. الايدا باسشىلىق ونىڭ العىرلىعىن بايقاپ قىزمەتىن جوعىرىلاتتى.
1970 جىلى لينينوگورسك سىرا زاۋىتىنىڭ باسشىسى بولىپ تاعايىندالدى. مۇندا ءىستى ورگە دوڭگەلەتتى. زاۋىتتىڭ تۇرالاپ قالعان سەحتارىن ىسكە قوستى. جۇمىستى جۇيەگە قويدى.
سودان سارىاعاش سىرا زاۋىتىنىڭ ديرەكتورى بولىپ اۋىستى. مۇندا دا جۇمىستىڭ تىگىسىن كەلتىرىپ، جۇمىسشىلاردىڭ الەۋمەتتىك جاعدايىن جاقسارتا ءبىلدى.
مۇنان كەيىن ارمەنياعا بارىپ، ابوۆيان سىرا زاۋىتىنىڭ تىزگىنىن قولعا الدى. ەكى جىلدان كەيىن شىمكەنت سىرا زاۋىتىنىڭ باسشىلىق قىزمەتىنە كەلدى. بۇل سالانىڭ قىر-سىرىن جەتىك مەڭگەرگەن مامان بولعاندىقتان جوعارى باسشىلىق قازاق كسر تاماق ونەركاسىبى مينيسترلىگى گلاۆپيۆوپروم باسقارماسىنىڭ باستىعى قىزمەتىنە كوتەردى. العا ۇلكەن ماقسات قويىلدى.
وتاندىق ءونىم ساپاسىن ارتتىرىپ، برەندتەر قالىپتاستىرۋ بولاتىن. ۇدەدەن شىعىپ، تاپسىرمالاردى ورىنداپ شىقتى. ونان كەيىن قازاق كسر گلاۆپلودوۆوششا مەملەكەتتىك كاسىپورنى باستىعىنىڭ ورىنباسارلىعى قىزمەتىندە وتىرىپ، تالاي ازاماتتارعا قول سوزىپ، بەرگەن كومەگىن كوپشىلىك ءالى كۇنگە جىرى قىلىپ ايتىپ وتىرادى.
تاۋەلسىزدىك العان جىلدارى «سۋسىندار» الماتى وندىرىستىك بىرلەستىگىنىڭ باس ديرەكتورى بولىپ قىزمەت اتقاردى. ول كەزدە دە بۇل سالانى مىقتى مامان رەتىندە وتە جوعارى دەڭگەيدە ۇستاۋعا تىرىستى.
ارينە، ەلدە بارلىق سالانىڭ شاشاۋى شىعىپ، ماماندارعا ايلىق تاپپاي ابدىراپ جاتقان كەز ەدى. تەك، بىلگىر باسشى ارتۋش مۋرەپ ۇلى عانا سان سوقپادى. كۇنى-تۇنى تىرلىك ەتتى. تاپقان تابىستى بارشاعا ورتاق ءبولىپ بەرىپ، قول استىنداعى جۇمىسشىلاردىڭ جاعدايىنا قارايلاستى. جۇمىس ءجۇرۋى ءۇشىن الدىمەن ونىڭ جاعدايى جاقسى بولۋى كەرەك ەكەنىن قىزمەت باستاعان كەزدە-اق تۇسىنگەن بولاتىن. سوندىقتان جۇمىسشىلاردىڭ جاعدايى بىلىكتى باسشىنىڭ نازارىنان ءبىر مينۋتقا دا قالعان ەمەس.
ال «باحۋس» اق باسقارعان جىلى زاۋىتتىڭ ءباسى بيىك بولدى. مۇندا ادامدار جۇمىسقا كىرۋگە ۇمتىلاتىن. ويتكەنى، مۇندا جۇمىسشىلارعا ەرەكشە جاعداي جاسالاتىن. سوندىقتان بۇل مەكەمە جۇمىسشىلارى ۇلكەن قىزمەتكەرلەرمەن يىق تىرەسەتىن ەدى. مىنە، كوپشىلىك ورتادا وزدەرىن بيىك ۇستاۋعا وسى ارتۋش مۋرەپ ۇلى قىزمەت ساتىلارىنداعى جيناعان مول تاجىريبيەسى دەسەك ارتىق ايتقاندىق ەمەس. مۇندا دا قاراپ وتىرماي، تانىمال برەندتەردى قالىپتاستىردى.
ول ۇلتارالىق كەلىسىمدى، قوعامدىق تۇراقتىلىقتى نىعايتۋعا، ءتۇرلى ۇلت وكىلدەرى اراسىنداعى دوستىق پەن ءوزارا تۇسىنىستىكتى ساقتاۋ جونىندەگى مەملەكەتتىك ۇلتتىق ساياساتتى جۇزەگە اسىرۋعا ۇلكەن ۇلەس قوسۋدا. ەتنومادەني بىرلەستىكتەر جەتەكشىلەرىنىڭ ديالوگىن قامتاماسىز ەتەدى. ا. كاراپەتيان 2023 جىلدىڭ 24 مامىرىنان باستاپ «نايري» قازاقستان رەسپۋبليكاسى ارميان مادەني ورتالىقتارى قاۋىمداستىعى» زاڭدى تۇلعالار بىرلەستىگىنىڭ قۇرمەتتى ءتوراعاسى بولىپ تابىلادى جانە ايماقتارداعى ارميان ەتنو-مادەني بىرلەستىكتەرىنىڭ قىزمەتىن باسقارۋدى جانە ۇيلەستىرۋدى جالعاستىرۋدا. بالالارعا قازاق جانە ارميان تىلدەرىن ۇيرەنەتىن ايماقتاردا جەكسەنبىلىك مەكتەپتەردى اشۋدىڭ باستاماشىسى.
ارتۋش كاراپەتيان قازاقستاننىڭ وڭتۇستىگىندەگى جۇزىمدىكتەردى ساقتاپ قالا الدى - «NUR» ج ش س، «Winnac Elite» بك ءجشس-نىڭ ءجۇزىم وسىرۋدەن، ولاردى زاۋىتتا وڭدەۋدەن جانە ءونىمدى ساتۋدان تولىق سيكلمەن تابيعي جانە جوعارى ساپالى بىرەگەي ءوندىرىسىن قۇردى. وتانىمىزدى كوركەيتۋ جانە وركەندەتۋ ماقساتىندا قازاقستان رەسپۋبليكاسىنىڭ ازاماتتارىن جۇمىسپەن قامتاماسىز ەتەتىن جانە مەملەكەتتىك بيۋدجەتتى تولىقتىراتىن فيرمالىق دۇكەندەر جەلىسىن قۇردى.
ەتكەن ەڭبەكتى بۇلداماي، كەرىسىنشە ءار ءىستىڭ سوڭىنا جەتكەن سايىن مىقتى ماقسات قويا ءبىلۋ كەرەك. مىنە، بۇل تۇرعىدان ايتقاندا ارتۋش مۋرەپ ۇلى وزىنە جوعارى تالاپ قوياتىن اردا ازامات.
ءالى كۇنگە دەيىن سوعىس جانە ەڭبەك ارداگەرلەرىنە، از قامتىلعان وتباسىلارعا، ونكولوگيالىق اۋرۋلارعا شالدىققاندار مەن جالعىزىلىكتى قارتتارعا ماتەريالدىق كومەك كورسەتەدى. سونىمەن قاتار، جەتىم بالالار مەن از قامتىلعان وتباسى بالالارىنىڭ جوعارى وقۋ ورىندارىندا وقۋ اقىسىن تولەپ بەرىپ وتىرادى.
ارتۋش كاراپەتيان جاقسى ىستەرىمەن كوپشىلىككە ۇلگى بولىپ كەلەدى. تاۋدىڭ بيىكتىگى تۇبىندە تۇرساڭ بىلىنبەيدى. سول سەكىلدى جانىمىزدا جۇرگەن جايساڭ ازاماتتاردىڭ جاقسىلىعىن كوپ باعالاي بەرمەيمىز. ەندەشە جانىڭدا جۇرگەن جاقسى ادامنىڭ باعالانعانى ءبىز ءۇشىن ءبىر مارتەبە!
