ەلباسى ن.ءا.نازاربايەۆتىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىن شيرەك عاسىردى ارتقا تاستاعان تاۋەلسىز قازاقستاننىڭ جاھاندانۋ داۋىرىندەگى رۋحاني كەڭىستىگىمىزدىڭ جاڭا باستاۋى دەپ باعالاۋىمىز كەرەك. ەلباسى نۇرسۇلتان ءابىش ۇلى نازاربايەۆتىڭ بۇل ماقالاسى ەل دامۋىنىڭ جارقىن ۇلگىسى مەن ناقتى قادامدارىن كورسەتەتىن كەلەلى وي، ساليقالى پىكىر، باتىل شەشىمدەرگە قۇرىلعان ماڭىزدى قۇجات.

بۇل ماقالادا سانانى جاڭعىرتۋ، ۇلتتىق بولمىستان، ۇلتتىق كودتان ايىرىلىپ قالماي، ونى الەمدىك قۇندىلىقتارمەن ۇيلەستىرىپ، قازاقستاننىڭ يگىلىگىنە جاراتۋ جولىنداعى ماقسات-مۇددەلەر تۋرالى وزەكتى ماسەلە كوتەرىلدى. تۇڭعىش پرەزيدەنت ماقالادا اتالمىش جاڭعىرۋدىڭ نەگىزگى قىزمەتى مەن ەرەكشەلىكتەرىنە وي جۇگىرتىپ، بۇل جاڭعىرۋدىڭ ماڭىزدىلىعىنا توقتالادى: «جاڭعىرۋ اتاۋلى بۇرىنعىداي تاريحي تاجىريبە مەن ۇلتتىق داستۇرلەرگە شەكەدەن قاراماۋعا ءتيىس. كەرىسىنشە، زامانا سىنىنان سۇرىنبەي وتكەن وزىق داستۇرلەردى تابىستى جاڭعىرۋدىڭ ماڭىزدى العىشارتتارىنا اينالدىرا ءبىلۋ قاجەت. ەگەر جاڭعىرۋ ەلدىڭ ۇلتتىق-رۋحاني تامىرىنان ءنار الا الماسا، ول اداسۋعا باستايدى. سونىمەن بىرگە، رۋحاني جاڭعىرۋ ۇلتتىق سانانىڭ ءتۇرلى پوليۋستەرىن قيىننان قيىستىرىپ، جاراستىرا الاتىن قۇدىرەتىمەن ماڭىزدى». ۇلتىمىزدىڭ بارلىق ۇلتتىق سالت-داستۇرلەرىن، مەملەكەتتىك ءتىلىمىز بەن ادەبيەتىمىزدى، مادەنيەتىمىزدى، ۇلتتىق رۋحىمىزدى جاڭعىرتۋ دەگەن اسىل ۇعىمداردى بىلدىرەتىن ەلباسىمىزدىڭ ماقالاسىن جۇزەگە اسىرۋ ماقساتىندا وڭىرىمىزدە ءتۇرلى دەڭگەيدە شارالار ۇيىمداستىرىلىپ كەلەدى.

ماسەلەن، جۋىردا شۋلىق جاستار «تاراز – وتكەن مەن بولاشاقتىڭ تۇيىسكەن قالاسى» اتتى جاس تۋريستەر فورۋمىنا قاتىسىپ، وتكەننەن سىر شەرتەتىن، ەكى مىڭ جىلدىق تاريحى بار قارت قالانىڭ تاريحي قۇندىلىقتارمەن تانىسىپ قايتتى. ناقتىراق ايتقاندا، تاراز قالاسىندا «مەنىڭ وتانىم - قازاقستان» اتتى تۋريستىك فەستيۆال وتكەن بولاتىن. وسى فەستيۆال اياسىنداعى «تاراز – وتكەن مەن بولاشاقتىڭ تۇيىسكەن قالاسى» اتتى جاس تۋريستەر فورۋمىنا اۋدان اكىمدىگى كاسىپكەرلىك جانە ونەركاسىپ ءبولىمىنىڭ باسشىسى بولاتجان تولەندييەۆ پەن مامانى جانىبەك يمانبايەۆ، №10 شۋ كوللەدجىنىڭ جاستارىمەن جۇمىس جاسايتىن ينسپەكتور ا.شالكينبەكوۆا اتالمىش كوللەدج بىلىمگەرلەرىن، جامبىل اتىنداعى شاعىن ورتالىقتى ورتا مەكتەبىنىڭ «بالالار-جاسوسپىرىمدەر ولكەتانۋ جانە تۋريزم» ورتالىعىنىڭ جاس ولكەتانۋشى ۇيىرمەسىنە قاتىساتىن وقۋشىلاردى ۇيىرمە جەتەكشىسى د.دجۋمابەكوۆ باستاپ اپارىپ، قاتىسىپ قايتتى.

شارا بارىسىندا جاستار كيەلى ورىنداردى ارالاپ، تاريحىمەن تانىستى. ارنايى تاريحي ورىنداردى تانىستىرۋشى گيدتىڭ ۇيىمداستىرۋىمەن وتكەن ۆيكتورينالىق سۇراقتارعا بىلىمگەرلەر مەن وقۋشىلار ۇلكەن قىزىعۋشىلىقپەن جاۋاپ بەرىپ، سىيلىقتارعا يە بولدى.

 

شۋ اۋدانى