الماتى وبلىسىندا وڭىرلىك كوممۋنيكاسيالار قىزمەتىنىڭ ۇيىمداستىرۋىمەن قادىرعالي جالايري ەسكەرتكىشىنىڭ الدىندا «تاريحي جول» ءموبيلدى قوسىمشاسىنىڭ تۇساۋكەسەرىنە ارنالعان باسپا ءسوز ءماسليحاتى ءوتتى.

شارا بارىسىندا AV-SoftWere كومپانياسىنىڭ وكىلدەرى ايبەك المۇحامەتوۆ پەن ەربولات قاناتبەك الماتى وبلىسىندا ءتۋريزمدى دامىتۋ مەن قازاقستان تاريحىن جاڭعىرتۋ ماقساتىندا ءموبيلدى قوسىمشا ىسكە قوسىلاتىندىعىن مالىمدەدى.

– ءبىز وتە باي تاريحى بار ەلدە تۇرامىز. قازىرگى قازاقستان اۋماعىندا ءتۋريزمدى دامىتۋعا مۇمكىندىك مول. ەل تاريحىنىڭ قىزىقتى فاكتىلەرىمەن قولجەتىمدى ءارى قولايلى تۇردە تانىستىراتىن ءموبيلدى قوسىمشانى ازىرلەدىك. بۇعان قوسا، قوسىمشا ەلىمىزدىڭ قوناقتارىنا مادەني-تاريحي تانىمال جەرلەرمەن جاقىن تانىسۋعا كومەكتەسەدى. «تاريحي جول» قوسىمشاسى ارقىلى بەس تىلدە جاڭا فورماتتا كەرەك جەرلەردى كورۋگە، تانىسۋعا مۇمكىندىك بەرەدى، – دەدى ا.المۇحامەتوۆ.

ايتا كەتەيىك، ەلىمىزدىڭ تاريحىن جاڭعىرتۋ جانە ءتۋريزمدى دامىتۋ ماقساتىندا جاسالعان قوسىمشا العاش رەت شىعىس قازاقستان وبلىسىندا پايدا بولعان. وندا ەلىمىزدەگى كيەلى جەرلەر تىزىمىنە كىرگەن 40 نىسان قامتىلعان بولسا، الداعى ۋاقىتتا الماتى وبلىسى بويىنشا 20 نىساندى قامتۋ جوسپارلانىپ وتىر. قوسىمشا ارقىلى كيەلى جەرلەر جايلى ماعلۇمات الۋمەن قاتار، وعان بارار جولدى دا كورۋگە بولادى.

«قاسيەتتى قازاقستان» جوباسى بويىنشا قولعا الىنعان بۇل قوسىمشانىڭ بەرەرى مول. ياعني ەلىمىزگە كەلۋشى تۋريستەر سانىنىڭ ارتۋىنا دا وزىندىك سەپتىگىن تيگىزبەك.

– ءموبيلدى قوسىمشا ينتەرنەتسىز ىستەيدى. ياعني الىس جەرلەردە ينتەرنەت ۇستاماي قالعان كەزدە ول ونىڭ كومەگىنسىز-اق، وفلاين رەجيمدە جۇمىس ىستەي بەرەدى. الداعى ۋاقىتتا ءبىزدىڭ جوبامىز بويىنشا الماتى وبلىسىندا 20 ەسكەرتكىشكە QR-كود ورناتۋعا تىرىسامىز، – دەيدى جوبانى ازىرلەۋشى ەربولات قاناتبەك.

بالجان قايرات قىزى