ۇلان اۋدانىنىڭ تارعىن اۋىلىندا ورنالاسقان «ديانا» شارۋا قوجالىعى «اۋىل اماناتى» باعدارلاماسى ارقىلى جارتىلاي فابريكاتتار وندىرەتىن سەحىن كەڭەيتىپ، اۋىل كاسىپكەرلىگىن دامىتۋعا سەرپىن بەردى، دەپ حابارلايدى Dalanews.kz
2021 جىلدان بەرى تابىستى جۇمىس ىستەپ كەلە جاتقان «ديانا» شارۋا قوجالىعى بۇگىندە اۋىل كاسىپكەرلىگىنىڭ دامۋىنا ءوز ۇلەسىن قوسىپ وتىر.
قوجالىق جەتەكشىسى بەردينوۆا اراي زارىكقان قىزى 2023 جىلى اۋىل ىشىندە جارتىلاي فابريكات ونىمدەرىن شىعاراتىن سەح اشىپ، ءوندىرىستى قولعا العان بولاتىن.
سەحتا ءتۇشپارا، ءمانتى، ۆارەنيكي سياقتى ۇن ونىمدەرى مەن فارش جاسالادى.
كاسىپتىڭ اۋقىمىن كەڭەيتۋ ماقساتىندا 2024 جىلى «اۋىل اماناتى» باعدارلاماسى ارقىلى 8 640 000 تەڭگە كولەمىندە جەڭىلدەتىلگەن نەسيە الىپ، ءوندىرىس ورنى كۇردەلى جوندەۋدەن ءوتىپ، جاڭا جابدىقتارمەن تولىقتى. بۇل سەحتىڭ جۇمىسىن جۇيەلەپ، ءونىم كولەمىن ارتتىرۋعا مۇمكىندىك بەردى.
بۇگىندە سەحتا اۋىلدىڭ 5 تۇرعىنى تۇراقتى جۇمىسپەن قامتىلعان. بۇل ءوز كەزەگىندە اۋىلدا جۇمىسسىز جۇرگەن ازاماتتارعا ۇلكەن كومەك.
شارۋاشىلىق يەسى اراي زارىققان قىزى كورسەتىلگەن قولداۋعا العىسىن ءبىلدىرىپ، الداعى جوسپارلارىن ءبولىستى.
- «اۋىل اماناتى» باعدارلاماسى بىزگە ۇلكەن دەمەۋ بولدى. جاڭا تەحنيكا الىپ، جۇمىس ورنىمىزدى كەڭەيتتىك. بۇل – تەك مەنىڭ عانا ەمەس، بۇكىل اۋىلدىڭ قۋانىشى. ەندى ءوندىرىستى ءارى قاراي دامىتىپ، اۋىلدىڭ اتىن شىعاراتىن ءونىم دايىنداۋدى ماقسات ەتىپ وتىرمىز، – دەيدى كاسىپكەر.
«ديانا» شارۋا قوجالىعىنىڭ بۇل باستاماسى اۋىل كاسىپكەرلىگىن قولداۋدىڭ ناقتى ناتيجەسى رەتىندە كوپكە ۇلگى. مەملەكەتتىك قولداۋدىڭ ارقاسىندا اۋىلداعى كاسىپ جاندانىپ، جەرگىلىكتى حالىقتىڭ تۇرمىسى جاقسارىپ كەلەدى.
