جامبىل وبلىسىنىڭ  ستۋدەنتتەرى وبلىستىڭ اكىمى كىم ەكەنىن ءالى كۇنگە بىلمەي ءجۇر. مۇنداي ماسقارانى تاراز قالاسىنداعى №12 كاسىپتىك كوللەدجىنىڭ بىلىمگەرلەرى شىعارىپ، جەرگە قاراتۋدا. بىلدەي-بىر وقۋ ورنىنىڭ ستۋدەنتتەرى  وبلىس اكىمى كارىم كوكىرەكبايەۆتان باستاپ، تاراز قالاسىنىڭ اكىمى نۇرجان كالەندەروۆتى، ودان قالسا ءبىلىم جانە عىلىم ءمينيستىرى ەرلان ساعادييەۆتى  تانىمايتىن بولىپ شىقتى. تانىمايتىنى بىلاي تۇرسىن، ولاردىڭ ەسىمىن ءومىرى ەستىمەگەندەرىن ايتۋدا.

اڭگىمەنىڭ ءالقيسساسىن ارىدان باستاساق، جۋىردا وبلىس اكىمدىگى جاستار ساياساتى ماسەلەلەرى باسقارماسىنىڭ باسشىسى ەركەبۇلان قۇرالبايەۆ №12 كاسىپتىك كوللەدجىنىڭ ستۋدەنتتەرىمەن كەزدەسىپ، وتاندى ءسۇيۋ، پاتريوتيزم تاقىرىبىندا ءدارىس وقىعان بولاتىن. باسقارما باسشىسى  ءدارىسىن باستاماس بۇرىن جيىلعان جاستاردان جاڭادان تاعايىندالعان ءبىلىم جانە عىلىم ءمينستىرىنىڭ ەسىمىن سۇراعان ەدى. الايدا بۇعان ستۋدەنتتەر ۇنسىزدىكپەن جاۋاپ بەردى. بالكىم جاڭا ءمينيستردىڭ ەسىمىن ستۋدەنتتەر  جاتتاپ ۇلگەرمەگەن بولار دەگەن ويمەن  باسقارما باسشىسى بۇدان كەيىن بۇرىنعى ءبىلىم ءمينيستىرى اسلان ءسارىنجىپوۆتىڭ ەسىمىن سۇرادى. ءبىراق، بۇل سۇراققا «ءلام-ليم» دەپ جاۋاپ بەرگەن ەشكىم  بولمادى. اشىنىپ كەتكەن ەركەبۇلان ەسەنعالي ۇلى: «تىم بولماسا، وبلىس اكىمىنىڭ، ءوز قالامىزدىڭ اكىمىنىڭ اتى-جوندەرىن بىلەسىزدەر ما؟»، – دەپ ءسوزىن نىقتاي ءتۇستى. الايدا بۇل ساۋالعا دا جاستار ءبىراۋىزدان «جوق» دەپ جاۋاپ بەردى. تەك، ءبىر عانا ستۋدەنت «بوزىمبايەۆ» دەپ جەردەن جەتى قويان تاپقانداي ورنىنان تۇرا كەلىپ، ءبارىمىزدى جەرگە قاراتتى. №12 كوللەدجدىڭ سىرتقى كورىنىسى

ءيا، وسىلايشا جامبىلدىق بىلىمگەرلەر وبلىستى ءالى كۇنگە بوزىمبايەۆ باسقارادى دەپ ويلاپ ءجۇر. بۇل ارينە ەڭ ءبىرىنشى كوللەدج باسشىلىعى مەن ۇستازدارىنىڭ جاۋاپسىزدىعى مەن ساۋاتسىزدىعى ەكەنى انىق. ايتپەسە، ءوڭىردى تۇپ-تۋرا ەكى جىل باسقارعان وبلىس اكىمىن تانىماۋ دەگەن ۇياتتى ءىس. ال وقۋ ورىندارىنا  ءبىلىم جانە عىلىم ءمينيستىرىن بىلمەۋ دەگەن ۇلكەن سىن. بۇل ماسەلەگە قاتىستى №12 كوللەدجىنىڭ ديرەكتورى مارات اشيموۆكە حابارلاسىپ، وقۋ ورنى ستۋدەنتتەرىنىڭ نە سەبەپتى ءبىلىمسىز ەكەنىن سۇراعان ەدىك.  الايدا ول كەتكەن كەمشىلىكتى  مويىنداۋدان گورى، ستۋدەنتتەرىن «سۇتتەن اق، سۋدان تازا» قىلىپ شىعارۋعا تىرىستى.

– بىزدە نەگىزى كاسىپتىك باعىتتاعى ماماندىقتار وقىتىلادى. سوندىقتان كوللەدجىمىزدى پەداگوگيكالىق ۋنيۆەرسيتەتتەرمەن سالىستىرۋعا كەلمەيدى. ستۋدەنتتەرىمىز وتە ۇياڭ. سىرتتان بىرەۋ كەلسە، ءبىلىپ تۇرعان نارسەسىن ايتا الماي قالادى. ءبىر جاعىنان  ولاردىڭ ءمينيستردى نەمەسە وبلىس، قالا اكىمىنىڭ ەسىمىن  بىلمەي قالعانىنا كوللەدج ديرەكتورى كىنالى ەمەس شىعار؟ – دەپ وزىمىزگە بالە سالدى. ول از دەسەڭىز، «ەگەر قالا  اكىمى  ءوزىنىڭ رەيتينگىن كوتەرگىسى كەلسە جۇمىس جاساسىن» دەپ شاھار باسشىسى نۇرجان كالەندەروۆكە ءجون سىلتەپ، تاعى قىزىققا باتىردى.

وسىلايشا №12 ارناۋلى ورتا وقۋ ورنىنا جاۋاپتى دەگەن باسشىدان باس شايقايتىن جاۋاپ ەستىدىك. ءتىپتى، كوللەدج ديرەكتورى بىلىمگەرلەرىنىڭ بىلىمسىزدىگىنە ءوزىن كىنالى  ەمەس سانايدى ەكەن. مىنە، عاجاپ. سوندا ستۋدەنتتەردىڭ ساۋاتتى ءبىلىم الۋىنا باسشى جاۋاپتى بولماعاندا، كىم جاۋاپتى؟

جالپى  جاستار باسقارماسىنىڭ باسشىسى ەركەبۇلان قۇرالبايەۆتىڭ ايتۋىنشا، مۇنداي جاعداي بارلىق وقۋ ورىندارىندا ورىن الۋدا ەكەن. اسىرەسە  شالعاي ەلدى مەكەندەردەگى كوللەدج ستۋدەنتتەرى  جوعارىدا اتالعان باسشىلاردىڭ ەسىمىن مۇلدە ەستىمەگەن كورىنەدى.

قالاي دەگەندە دە، بۇل بەي-جاي قارايتىن ماسەلە ەمەس. ويتكەنى №12 كوللەدج ستۋدەنتتەرى مەملەكەت قارجىسىنا تەگىن ءتالىم الىپ، وعان قوسا  تەگىن تاماق پەن جاتىن ورىنمەن قامتىلعان. ۇكىمەت تاراپىنان وسىنداي قامقورلىق جاسالىپ جاتقاندا ءبىلىم ءمينيسترى، وبلىس اكىمى، قالا باسشىسىنىڭ ءاتى-جونىن بىلمەۋ ماسقارا.  مۇنداي جاستاردان ەرتەڭ بىلىكتى مامان شىعادى دەپ قالاي ايتا الامىز؟  مۇمكىن، كۇنى ەرتەڭ «مەن كىنالى ەمەسپىن» دەپ اتتونىن الا قاشاتىن مارات اشيموۆتاي ديرەكتورىمەن كوللەدج ستۋدەنتتەرى ەلباسىنىڭ دا ەسىمىن جاتقا ايتا المايتىن كۇيگە جەتەر؟ سوندىقتان جاۋاپتى سالا ماماندارى بۇل ماسەلەنى تەز ارادا  قولعا الىپ، جۇگەنسىز كەتكەن كوللەدج ديرەكتورىن جونگە كەلتىرۋى  قاجەت.

بۇعان وبلىستىق ءبىلىم باسقارماسىنىڭ باسشىسى سۇلۋشاش قۇرمانبەكوۆا نە دەر ەكەن، ءا؟

ساياتحان ساتىلعانوۆ

دەرەككوزى: elana.kz